Almaty joldaryna qazaqstandyq óndiristiń Golden Dragon markaly jańa avtobýstary shyqty. Syǵylǵan tabiǵi gazben (CNG) jumys isteitin ekologiialyq avtobýstar asa qarqyndy jolaýshylar aǵyny bar baǵdarlarǵa qyzmet kórsetedi, dep habarlaidy "Ult aqparat" Indýstriia jáne infraqurylymdyq damý ministrligine silteme jasap.
Avtobýs parkin jańartý jáne qalanyń qozǵalys baǵdarlary jelisin ulǵaitý boiynsha kólik reformasy sheńberinde «Astana Motors» kompaniiasy elimizde qurastyrylǵan Golden Dragon 18 metrlik jańa 60 ekologiialyq avtobýstardy shyǵardy.
«18 metrlik avtobýstardyń syiymdylyǵy asa qarqyndy jolaýshylar aǵyny bar qalalyq baǵdarlarǵa qyzmet kórsetýge múmkindik beredi. Golden Dragon barlyq biriktirilgen avtobýstardyń qozǵaltqyshtary gazben jumys isteý úshin beiimdelgen, janý kezinde ziiandy zattardyń eń az mólsheri paida bolady, bul qalalyq kólik úshin óte mańyzdy. Aldaǵy tórt jylda bul otyn túrine el boiynsha 50 myń birlik avtokólikti aýystyrý josparlanyp otyr» delingen habarlamada.
Barlyq avtobýstar Eýro-5 standartynyń talaptaryna sai. Tómen qabatty avtobýstardyń keń salonynda barlyq qaýipsizdik, beinebaqylaý, aqparattandyrý, dispetcherlermen bailanys júieleri bar, konditsioner bar. Múmkindigi shekteýli jolaýshylarǵa yńǵaily bolý úshin arnaiy mehanikalyq platformalar qarastyrylǵan. Avtobýstardyń syiymdylyǵy - 150 jolaýshy, 36 - otyratyn oryn jáne 1 - múmkindigi az jolaýshylar úshin.
«Kompaniia otandyq avtobýstardy shyǵarýdy jolǵa qoidy jáne jolaýshylar men júrgizýshilerdiń barynsha qolailylyǵy úshin tasymaldaýshylardyń barlyq suranystaryn esepke alýǵa múmkindigi bar. Otandyq avtobýstardy shyǵarý elimizdiń asa tozǵan qoǵamdyq kóligin jańartý jónindegi memlekettik baǵdarlamany tabysty iske asyrýǵa septigin tigizetinine senimdimiz. Elimizdiń avtobýs parkteri úshin qolaily qarjylyq jaǵdai jasalǵan jáne olar tehnikany yńǵaily sharttarmen qarjy lizingine satyp ala alady», - deidi «Astana Motors» kompaniiasynyń bas direktory Beknur Nesipbaev.
Avtobýstar QR Indýstriia jáne infraqurylymdyq damý ministrligi men «QDB-Lizing» AQ baǵdarlamasyn júzege asyrý aiasynda qoǵamdyq kólikti otandyq avtobýstarmen jańartý jáne jańǵyrtý boiynsha satyp alynǵan. Atalǵan baǵdarlama Qazaqstan Respýblikasy Úkimetiniń qoldaýymen iske qosyldy jáne eldiń avtobýs parkine kelisim-shart qunynyń 15% bastapqy jarnasymen 7 jyl merzimge nesie berý mólsherlemesimen tehnika satyp alýǵa múmkindik beredi. Qazirgi ýaqytta búkil el boiynsha asa tozǵan, paidalaný merzimi 12 jyldan asqan 6 myńnan astam avtobýs tirkelgenin eskersek, atalmysh baǵdarlama jolaýshylar tasymaly jelisinde halyqqa qyzmet kórsetý sapasynyń deńgeiin arttyrýǵa múmkindik beredi.
