Fýtboldan 2020 jylǵy Eýropa birinshiliginiń irikteý kezeńi aiasynda búgin Qazaqstan quramasy syrt alańda Kiprmen kezdesti, dep habarlaidy "Ult aqparat".
Esterińizge sala keteiik, qazaqstandyqtar I tobynda synǵa túsedi. Qarsylastary - Belgiia, Resei, Shotlandiia, San-Marino jáne Kipr quramalary.
Búgingi kezdesýde bizdiń qurama sapynda alǵashqy minýttan Dmitrii Nepogodov, Ǵafýrjan Súiimbaev, Temirlan Erlanov, Sergei Malyi, Aleksandr Marochkin, Ian Vorogovskii, Islambek Qýat, Iýrii Pertsýh, Ashat Taǵybergen, Baýyrjan Islamhan, Aleksei Shetkin shyqty.
Olarǵa qarsy kiprlyq fýtbolshylar - Kostas Panaii, Nikolas Ianný, Kostas Laifis, Giorgos Merkis, Kostas Midikkis, Hambos Kiriaký, Iannis Kýsýlos, Grigoris Kastanos, Fotis Papýlis, George Efrem, jáne Pieros Sotiriý oinady.
Aita keterligi, Qazaqstan men Kipr quramalarynyń sheberlik deńgeii shamalas. Kiprlyqtar búgingi kúnge deiin álem jáne Eýropa birinshiliginiń finaldyq satysynda baq synap kórgen joq. Irikteý kezeńinde týrnir kestesinde negizinen tómengi oryndarda kórinedi.
Qos qurama buǵan deiin eki márte joldastyq kezdesý ótkizdi. Alǵashqysynda 2004 jyldyń 21 aqpanynda Kipr halyqaralyq týrnirinde jolyǵyp, bizdiń qurama alań ielerinen 1:2 esebimen jeńilip qaldy. Odan keiin 2017 jyldyń 22 naýryzynda sol elde joldastyq kezdesýde sheberlik baiqasty. Bul kezdesýde quramamyz 1:3 esebimen qarsylasyna ese jiberdi.
Sondyqtan búgingi kezdesý alǵashqy minýttan tartysty órbidi. Bizdiń qurama jyldam gol soǵyp ketti. Ony 2-minýtta shabýylshy Aleksei Shetkin oryndady. Oǵan áriptesi Ǵafýrjan Súiimbaev ádemi pas shyǵaryp berdi. Budan keiin alań ieleri namysqa tyrysyp, alǵa qarai umtyldy. Degenmen, kózdegen maqsatyna jete alǵan joq. Tek 39-minýtta Pieros Sotiriý tarazy basyn teńestirdi. Birinshi kezeń aiaqtalar tusta aiyp dobyn sheber oryndaǵan Baýyrjan Islamhan tepken dopty qarsylas qurama qaqpashysy áreń syrtqa shyǵaryp úlgerdi.
Ekinshi kezeńde qos qurama esepti ózgertýge tyrysty. Ásirese alań ieleriniń belsendiligi aiqyn ańǵaryldy. Degenmen oiyn esebi ózgergen joq. Kezdesý 1:1 esebimen teń aiaqtaldy.
Qazaqstan endi 9 qyrkúiekte syrt alańda Resei quramasymen oinaidy.
Búginge deiin bizdiń fýtbolshylar tórt oiyn ótkizdi. Aldymen 21 naýryzda óz alańynda Shotlandiiany 3:0 esebimen oisyrata jeńse, odan keiin 24 naýryzda Reseige 0:4 esebimen jol berdi. Al 8 maýsymda syrt alańda Belgiiadan 0:3 esebimen jeńilse, 11 maýsymda elordada San-Marinony 4:0 esebimen tize búktirdi.
Búgin bizdiń topta taǵy eki kezdesý ótkiziledi. Toptyń úzdikteri Resei Shotlandiiaǵa, Belgiia San-Marionoǵa qonaqqa barady.
