Eýraziia ekonomikalyq komissiiasynyń ónerkásip jáne agroónerkásiptik keshen ministri Aleksandr Sýbbotin Qazaqstanǵa úshinshi elderge ortaq brendpen shyǵýdy usyndy, dep habarlaidy QazAqparat.
«Postkeńestik keńistikte mashina jasaý salasynyń kooperativtenýi ulttyq ekonomika saiasatynyń sheńberimen shektelip keldi. Eýraziia ekonomikalyq odaǵynyń qurylýy osy sheńberdiń aiasyn keńeitip, kásiporyndardyń damýyna jańa serpin berdi. 2018 jyldyń qorytyndysy boiynsha, kooperativtik jetkizý kólemi mashina men qondyrǵylar óndirisinde 15 paiyzǵa, avtomobil qurastyrýda 14 paiyzǵa, elektr qondyrǵylar óndirisinde 10 paiyzǵa ósti. Sońǵy jyldary kooperativtendirý bailanystarynyń arqasynda eki el arasyndaǵy taýar ainalymy 40 paiyzǵa artty. Endi odaq aiasynda mashina jasaýshylardyń ortaq derek bazasy qurylmaq. Oǵan kirgen 6 myń kásiporynnyń 90-y — qazaqstandyq kompaniialar. 2020 jyldyń aiaǵynda bul bazaǵa 50 myń kásiporyn tirkeledi degen boljam bar», - degen odaq ókili úshinshi elderge ónim shyǵarý barysynda týyndaityn ózara báseke týraly da sóz qozǵady.
«2018 jyly Qazaqstan mashina jasaý óndirisiniń ósimi boiynsha Odaq elderiniń arasynda alǵashqy orynǵa shyqty. Ósim kólemi 26 paiyzdan asady. Avtokólik pen onyń bólshekterin shyǵarý 40 paiyzǵa, elektr qurylǵylarynyń óndirisi 30 paiyzǵa, mashina qondyrǵylaryn shyǵarý 7 paiyzǵa, kompiýterler men elektrondyq ónimderdiń, optikalyq buiymdardyń óndirisi 30 paiyzǵa ósti. Qazir birlesip shyǵarǵan ónimderdi úshinshi elderge shyǵarýdyń tetikteri rettelip keledi. Bul tusta ózara básekege túspei, ortaq brendimizdi syrtqy naryqqa ilgeriletý baǵytynda áreket jasaý qajet dep oilaimyz», - dedi Aleksandr Sýbbotin.
