«Evoliýtsiianyń 15 jyly: qubylmaly dúnie jáne bizge ózgeris ákelgen álem» degen taqyrypta Eýraziia Media Forýmy bastaldy, dep habarlaidy forýmnyń baspasóz ortalyǵy.
Forýmnyń alǵashqy kúni saǵat 9:00-19:00-ge deiin 7 avtorlyq sheberlik dáristeri josparlanýda.
Sharanyń alǵashqy sheberlik dárisin «#Hashtag our stories» kompaniiasynyń negizin qalaýshy Iýsýf Omar bastady. Dáris taqyryby: «Mobildi jýrnalistikadan áleýmettik virtýaldy shyndyqqa deiin». Ol jańa tendentsiialar, toqsan toǵyz taraptan shynaiy málimetti terip, áp-sátte álemniń kez-kelgen túkpirinen aqparat alý men taratý múmkindigi týraly baiandady.
Iu.Omardyń sheberlik dárisine jinalǵandardyń deni kóp boldy. Sondai-aq, ol «zamanýi mýltimedia» týraly bilgenimen bólisip, qatysýshylar suraqtaryna jaýap berdi.
«Jeti milliard adam qazirgi tańda óz uialy telefondary arqyly jańalyqtar jarshysy bola alady. Aqparattyq tehnologiia damyǵan zamanda dástúrli BAQ-tyń atqarar roli qandai? Meniń oiymsha, dástúrli BAQ ókilderi analitika men kontekstke negizdelý kerek. Sonymen qatar, BAQ ókilderi feik jańalyq pen aqiqattyń ara-jigin ajyrata bilýi tiis. Bul qaǵidalar medianaryqtyń álemdik ornyn saqtap qalýǵa qyzmet jasaidy», - dedi ol óz sózinde.
Sonymen qatar, táýelsiz sarapshy Saiasat Nurbek mektep baǵdarlamasyna aqparattyq saýattylyqty arttyratyn pánderdi engizýdi usyndy.
«Qazirgi tańda aqparatty daiarlaý men ony shyǵarý merzimi qysqaryp ketti. Buryn jýrnalister úshin aqparat jinaý qanshama ýaqyt alatyn, olarǵa redaktor tapsyrma beretin. Qazir jarty saǵattyń ishinde jeke sýbektivti pikiri men emotsiiasyna negizdelgen blogerdiń jazǵan aqparatyn bir saǵattyń ishinde myńdaǵan, milliondaǵan adam kóredi de, sol pikirge súienedi. Dástúrli BAQ-tyń ishki óndirisiniń ózi ózgerip jatyr. Aqparat daiarlaý aqparatty tekserý, jalǵan habar degen qazirgi tańda óte kóp. Nege deseńiz emotsiiaǵa negizdelgen jalǵan habarǵa sený de ońai bolyp ketti, sondai-aq jańa tehnologiialardyń arqasynda tez taralady», - dedi sarapshy.
Sharanyń alǵashqy kúninde budan ózge 6 avtorlyq sheberlik sabaqtary josparlanyp otyr.
Jýrnalisterge tegin sheberlik dáristerin ótkizý Forýmnyń Áleýmettik seriktesi - “Samruk-Kazyna Trust” Áleýmettik jobalardy damytý qorynyń qoldaýymen júzege asyp otyr.
Forým óz tarihynda 6000 asa sheteldik qatysýshylardy, olardyń qatarynda tanymal jýrnalister, belgili saiasatkerler, myqty ekonomister, nobel syilyǵynyń laýreattary, qoǵam qairatkerleri, ǵalymdar men kásipkerlerdi Qazaqstanǵa jinady.
Bul rette, sheteldik spikerler Qazaqstannyń álem aldyndaǵy bedeliniń kún sanap artyp kele jatqandyǵyn alǵa tartty.
Eske sala keteiik, forým barysynda 300-den asa sheteldik jáne otandyq BAQ ókilderi forým jańalyqtaryn shartarapqa taratýda.
