Búgin elordadaǵy «Kórme» ortalyǵynda «Eurasian Book Fair-2019» IV Eýraziialyq halyqaralyq kitap kórme-jármeńkesiniń ashyldy. Bul shara 27 sáýirge deiin jalǵasady, dep habarlaidy "Ult aqparat".
«Elordamyzda tórt kún ótetin IV Eýraziia halyqaralyq kitap kórme-jármeńkesine jinalǵan jurtshylyqty kórgenime qýanyshtymyn. Biz búgin Eýraziia aýmaǵyndaǵy mańyzdy mádeni sharanyń kýágeri atanyp otyrmyz. Kitap forýmyn ótkizý - elimizdegi ádebiet salasynyń ǵana jetistigi emes, ol barlyq kitapsúier qaýymnyń merekesi», - dep atap ótti saltanatty is-sharany ashqan QR Mádeniet jáne sport ministri Arystanbek Muhamediuly.
«Eurasian Book Fair» - eýraziialyq halyqaralyq kitap kórme-jármeńkesi elimizdegi iskerlik jáne gýmanitarlyq áriptestikti damytý jáne nyǵaitý maqsatynda TMD, Eýropa jáne Aziia elderiniń baspa, kitap saýdasy uiymdaryn, mádeni jáne bilim berý ortalyqtaryn úlken ziiatkerlik alańǵa biriktiretin asa iri kitap forýmy.
Bul kórmege 13 memleketten kelgen 90 kompaniia qatysýda. Onyń ishinde Resei, Ázerbaijan, Tájikstan, Armeniia, Qyrǵyzstan, Túrkiia, Qytai, Iran, Polsha, Belgiia, Latviia, Ýkraina, Ózbekstan bar.
Jastar jyly aiasynda jas avtorlardyń qatysýymen «Ashyq áńgime» aqyndyq marafon, kitaptyq áńgimelesý (book talks), ádebiet klýbynyń otyrysy, «Kitapty qalai tiimdi oqý kerek?» taqyrybyna arnalǵan sheberlik synyptary, tanymal aqyn-jazýshylarmen avtograf-sessiialary uiymdastyrylady. Olardyń ishinde balalar kitaby Búkilreseilik festivaliniń direktory jáne jazýshy Iýrii Nechiporenko, «Kit plyviot na sever», «Sovinyi volk» kitaptarynyń avtory Anastasiia Strokina bar.
Shara aiasynda tanymal mádeniet qairatkerleri, jazýshylar jáne aqyndarmen kezdesýler uiymdastyrylady. Olardyń arasynda jas aqyn Mergen Toqsanbai men Qazaqstan Respýblikasynyń Jazýshylar odaǵynyń tóraǵasy, aqyn Ulyqbek Esdáýlet bar.
Kórme-jármeńkeniń alǵashqy kúni L.N.Gýmilev atyndaǵy Eýraziia ulttyq ýniversitetiniń rektory Erlan Sydyqovtyń «Shákárim» atty kitabynyń tusaýeser rásimi boldy. Sharany akademik Dihan Qamzabekuly júrgizip otyrdy. Jiynda birqatar memleket jáne qoǵam qairatkerleri avtordyń «Shákárim» eńbegine qatysty oi-pikirlerin bildirdi.
Óz kezeginde sóz alǵan E. Sydyqov san tilge aýdarylǵan eńbektiń arǵy-bergi tarihyna toqtala kelip, jaǵymdy jańalyq - súiinshi habardy jariia etti. Atap aitqanda, aǵymdaǵy jyly «Qunanbai» atty kitaby Resei elinen «JZL» seriiasy boiynsha jaryq kórmekshi.
