Foto: Sm1.k
Estoniianyń Qazaqstandaǵy elshisi Iaap Ora Estoniia prezidenti Alar Karistiń Qazaqstanǵa jasaǵan saparynan keiin otstavkaǵa ketti, dep habarlaidy Ult.kz Dalanews.kz saityna silteme jasap.
Karistiń Qazaqstanǵa sapary 17–18 qarasha kúnderi ótti. Prezidentpen birge jubaiy Sire Karis pen delegatsiiasy kelgen. Sapar barysynda ol biznes-forýmǵa qatysyp, nátijesinde taraptar 11 kommertsiialyq qujatqa qol qoidy.
Alaida birneshe aptadan keiin Estoniia mediasynda daý týyndady: Karis Qazaqstanda sóilegen sózderinde birde-bir rýsofobiialyq pikir aitpaǵany jáne Ýkrainadaǵy qaqtyǵysty bir ret te eske almaǵany belgili boldy.
Jýrnalisterdiń aitýynsha, «sapar barysynda Estoniianyń Qazaqstandaǵy elshisi Iaap Ora prezidentke jáne onyń syrtqy saiasat jónindegi keńesshisi Margýs Kolgaǵa Ýkrainaǵa qatysty tujyrymdardy jumsaǵyraq jetkizýdi usynǵan».
Karis elshiniń keńesin eskerip, óz sózin qaita qarap shyqqan, ýkrain qaqtyǵysyna qatysty joldardy alyp tastap, qazirgi geosaiasi jaǵdaidy barynsha beitarap sipattaǵan.
Mediada qyzý talqylaý bastalǵannan keiin Estoniianyń elshisi otstavkaǵa ketý týraly sheshim qabyldady.
Estoniia SIM habarlaýynsha, «shielenisti báseńdetý úshin Estoniianyń Qazaqstandaǵy elshisi Iaap Ora kelesi jyldan bastap qyzmetten óz erkimen ketýdi uiǵarǵan».
