Petropavlda qurylys jumystary kezinde adam súiekteri tabyldy. Tarihi derekterge sáikes, qazirgi qurylys alańy ornalasqan aýmaqta XIX ǵasyrdyń sońynda paida bolǵan iri pravoslavielik zirat bolǵan. Onda 10-15 myńǵa deiin adam jerlenýi múmkin, dep habarlaidy ult.kz.
Petropavlovsk.news basylymynyń málimetinshe, adam súiekteri shamamen eki apta buryn jer qazý jumystary kezinde anyqtalǵan. Keiin qurylys alańyna eriktiler kelip, arnaiy tehnika jumysy aiaqtalǵan soń, topyraq arasynan tabylǵan súiekterdi jinaýǵa kómektesken. Sonymen qatar jerden moiynǵa taǵatyn krestter de tabylǵan.
Tarihi málimet boiynsha, zirat Petropavldyń sol kezdegi shetinde 1890-1894 jyldary Barlyq Áýlieler shirkeýiniń qurylysy bastalǵan kezeńde paida bolǵan. Sońǵy jerleý rásimderi 1950-jyldary júrgizilgen.
Basylym málimetinshe, burynǵy zirat aýmaǵynyń bir bóligi búginde Jambyl kóshesi, «Avangard» stadiony jáne basqa da nysandardyń astynda qalǵan. Bul aýmaqta buǵan deiin de adam súiekteri tabylǵan.
2008 jyly qurylys kezinde tabylǵan súiekter Barlyq Áýlieler shirkeýiniń mańyna qaita jerlenip, bul týraly eskertkish ornatylǵan. Shirkeý ókilderiniń aitýynsha, burynǵy zirattyń kei bóligi keiin túrli qurylys nysandaryna berilgen.
Súiekter tabylǵannan keiin qurylys alańyna politsiia shaqyrylǵan.
«Adam súiekteriniń tabylýyna bailanysty politsiiada material tirkeldi. Qylmystyq sipattaǵy belgiler anyqtalǵan joq. Súiekterdiń shyǵý tegin jáne olardyń tabylýyna qatysty ózge de mán-jailardy anyqtaý úshin tekserý taǵaiyndaldy. Onyń nátijesi boiynsha túpkilikti qorytyndy jasalady», – dep habarlady politsiia departamenti.
Petropavl qalasynyń ákimdigi buǵan deiin jinalǵan adam súiekteriniń qaita jerlengenin rastaǵan.
Alaida súiekterdiń naqty qai jerge qaita jerlengeni, rásimniń qashan ótkeni jáne qansha qaldyq jinalǵany týraly málimet berilmegen.
Sondai-aq qurylys jumystary barysynda jańa súiekter tabylǵan jaǵdaida olardy kim jinaityny jáne bul protsesti kim baqylaityny ázirge belgisiz.
