Aqmola oblysynda 18 jastaǵy stýdent qyzdar sintetikalyq esirtki taratty degen kúdikpen ustaldy, dep habarlaidy QazAqparat Polisia.kz saityna silteme jasap.
«Refleks» jedel aldyn alý is-sharasy kezinde sintetikalyq esirtkilerdi jasyrýmen ainalysatyn kolledj stýdentteri ustaldy. Olar bul isti qosymsha jumys izdep júrip, internettegi habarlandyrý arqyly tapqan. Habarlandyrýda ashanada isteitin jumys kórsetilgen. Onda tabys kúnine 30 myń teńgege deiin jetetindigi aitylǵan. Alaida hat almasý barysynda qyzdar bul istiń esirtkimen bainalysty ekenin túsinedi. Soǵan qaramastan, usynystan bas tartpaǵan.
««Refleks» respýblikalyq jedel-aldyn alý is-sharasy aiasynda Kókshetaý qalasynyń aýmaǵynda «Oqjetpes» stadionynyń janynda sintetikalyq esirtki zattaryn jasyrýmen ainalysatyn 2 stýdent qyz ustaldy. Olardan esirtkiniń 95 túiinshegi tárkilendi», – dedi Aqmola oblystyq Politsiia departamenti Esirtki qylmysyna qarsy kúres basqarmasynyń bastyǵy Meiram Japbasov.
Aqmola oblysy Politsiia departamenti bastyǵynyń orynbasary Erlan Qasym málim etkendei, joǵary synyp oqýshylary men stýdentter mundai habarlandyrýlarǵa jii jaýap beredi jáne olardyń arasynda bul isti tastamai, artynan temir torǵa túsetinder de bar.
Jedel qyzmetkerlerdiń aitýynsha, qyzdar birlesip jumys istegen. Biri esirtkini jasyrsa, ekinshisi onyń qaida jasyrylǵanyn túsirip, tapsyrys berýshimen hat almasyp otyrǵan.
Tintý kezinde 18 jastaǵy stýdent qyzdan untaqty, belgili bir iisi bar, aq jáne kók tústi zat salynǵan 34 túiinshek tárkilendi. Al oiynshyq qonjyqtan osyndai zat salynǵan 60 túiinshek tabyldy.
«Qazirgi ýaqytta atalǵan fakti boiynsha QR QK-niń 296-baby 2-bóligimen saraptama taǵaiyndaldy, onyń nátijeleri boiynsha is QR QK-niń 297-baby 3-bóligimen qaita saralanatyn bolady. Osy bap boiynsha 15 jylǵa deiin bas bostandyǵynan aiyrý jazasy qarastyrylǵan», – dep atap ótti Meiram Japbasov.
Jyl basynan beri Aqmola oblysynda esirtki jasyrýmen ainalysyp kelgen 12 adam ustaldy, olardyń úsheýi – kámeletke tolmaǵandar. Zańsyz ainalymnan jarty keliden astam sintetikalyq esirtki tárkilendi.
