Sintetikalyq esirtki geroindi naryqtan yǵystyra bastaǵan. Bul týraly Ishki ister ministrligi Esirtki qylmysyna qarsy is-qimyl departamentiniń basqarma bastyǵy Baqytjan Ámirhanov aitty, dep habarlaidy QazAqparat.
«Astanadaǵy psihikalyq densaýlyq ortalyǵy mamanynyń aqparaty boiynsha, búginde gerionge táýeldi nashaqorlar sirek kezdesetin bolǵan. Qazir kóbine sintetikalyq esirtkige táýeldi naýqastar kóp túsedi. Onyń kóbi aýyr ári tereń psihoz dertine jáne ortalyq júike júiesiniń saldanýyna shaldyǵady», - deidi maman.
Onyń aitýynsha, mundai esirtkini satýshylar internettiń áleýetin túgel paidalanyp júr.
«Biz óz jumysymyzda esirtki jarnamasymen kúreske basymdyq berip otyrmyz. Zańnamadaǵy túzetýler boiynsha bul áreketter aýyr jáne asa aýyr qylmys túrine jatqyzylǵan, ómir boiy bas bostaǵandyǵynan aiyrýǵa deiin uzaq merzimdi jaza qarastyrylǵan.Biyl 5 aida esirtki saýdasymen bailanysty 105 sotqa deiingi tergeý tirkeldi. Onyń 56-sy jarnamamen, 49-i internet satýmen bailanysty», - dedi basqarma basshysy.
Sondai-aq, ol zańnama arqyly 89 psihikalyq aktivtiń zattyń ataýyn tiisti normalarǵa engizý arqyly belgili sintetikalyq esirtkiniń bárin quqyqtyq alańǵa shyǵarý múmkin bolǵanyn eske saldy.
«Osynyń arqasynda 2018-2020 jyldar aralyǵynda tárkilengen sintetikalyq esirtki kólemi ondaǵan ese artty. Úsh jyl buryn 5 keli tárkilense, 2020 jyly 96 keli tárkilendi. Jyl basynan beri ǵana 41 keli sintetikalyq esirtki tárkilenip, esirtkimen bailanysty 529 qylmys tirkeldi. Onyń ishinde 219 sintetikalyq ersitki satý, 48 saqtaý faktisi anyqtaldy. Esirtki jarnamasyn taratqan 740 sait buǵattalyp, 10 zerthana jabyldy. Ol jerden 15 keliden astam daiyn esirtki, 35 litr qosalqy suiyqtyq tabyldy», - dedi Baqytjan Ámirhanov.
