«Samuryq-Qazyna» Ulttyq ál-aýqat qory» AQ basqarmasynyń tóraǵasy Ahmetjan Esimov ulttyq kompaniia qyzmetkerlerine bonýs qalai eseptelinetindigin túsindirdi, dep habarlaidy QazAqparat.
«Bonýs anyqtalatyn sálette korporativtik basqarý bolady. Eń aldymen KPI (Key Performance Indicators – tiimdiliktiń negizgi kórsetkishteri) belgilenetin birneshe sanat bar. Eger sol KPI 20, 30 paiyzǵa jáne odan kóp paiyzǵa oryndalsa, munyń barlyǵy esepke alynady. Sodan keiin baryp Direktorlar keńesi bonýsty bekitedi», - dedi Ahmetjan Esimov Úkimet otyrysynan keiin BAQ ókilderiniń saýalyna orai.
Onyń atap ótýinshe, qyzmetkerlerdi sapaly jumys isteýge yntalandyrý úshin bonýs qajet.
«Bul kompaniialarda jumys isteý ońai emes. Olar bizdiń jetekshi kompaniialarymyz. Sondyqtan ol jerde óte jaqsy mamandar bolýy tiis. Sebebi jaqsy mamandar óte úlken paida ákeledi. Atalǵan kompaniialarda kásibi mamandardyń jumys isteýiniń arqasynda biz jaqsy tabysqa jetip otyrmyz», - dedi qor basshysy.
A.Esimovtiń sózine qaraǵanda, jasalǵan jumysqa aýdit júrgizilgennen keiin ǵana qyzmetkerlerge bonýs beriledi.
