Búgin Úkimettiń baspasóz ortalyǵynda ótken brifing barysynda QR energetika vitse-ministri Suńǵat Esimhanov jylytý maýsymyna daiyndyq barysy týraly aityp berdi, dep habarlaidy "Ult aqparat".
S. Esimhanov Qazaqstannyń biryńǵai elektr energetikalyq júiesi shtattyq rejimde jumys istep turǵanyn aitty. Osy jyldyń 19 qyrkúiegindegi málimetterge sáikes respýblika boiynsha elektr energiiasyn tutyný 72,5 mlrd kVts qurady, bul ótken jyldyń deńgeiinen 1,7%-ǵa artyq.
Sonymen qatar, vitse-ministr energiia kásiporyndaryn kúzgi-qysqy kezeńge daiyndaý bekitilgen jóndeý kestelerine sáikes júrgizilip jatqanyn atap ótti.
«Aǵymdaǵy kúnge 5 energoblokta jóndeý júrgizildi, bul jyldyq kólemniń 45%-yn, 40 qazandyqty quraidy, bul jyldyq kólemniń 63%-y jáne 23 týrbina, bul jyldyq kólemniń 50%-yn quraidy. Jóndeýdiń ártúrli kezeńinde 4 energiia blogynda, 28 qazandyqta jáne 18 týrbinada jumystar júrgizilýde.
Elektr jelileri boiynsha 21 myń shaqyrym elektr jetkizý jelileri men 1152 shaǵyn stantsiiaǵa jóndeý jumystary júrgizildi, bul jyldyq jospardyń tiisinshe 84% jáne 92%-yn quraidy.
Aldaǵy jylytý maýsymyna daiyndyq úshin ortalyqtandyrylǵan jylýmen qamtý aimaǵynda 459 qazandyqtyń 428 qazandyǵyna jóndeý jumystary júrgizildi, bul jyldyq jospardyń 93%-yn quraidy.», — dedi S. Esimhanov.
Sonymen qatar, S. Esimhanovtyń aitýynsha, birqatar óńirlerde Jóndeý kestesinde belgilengen merzimderdiń saqtalmaýy jáne artta qalýy baiqalady.
«Osy Keste boiynsha júrmei jatqan birneshe mysaldy keltirýge bolady. Muny biz kásiporyndarǵa eskertý retinde aitamyz. Máselen, Pavlodar oblysynda ornalasqan «Eýroaziattyq energetikalyq korporatsiia» AQ elektr stantsiiasy. Bul eń iri memlekettik aýdandyq elektr stantsiiasy (MAES). Munda ákimdik, aktsionerlermen qatar, bizdiń Komitet te baqylaý jasaidy. Búginde eki blok – №5 jáne №8 boiynsha Kesteden qalyp jumys isteýde. Olar maýsym men tamyz ailarynda aiaqtalýy tiis edi, alaida, ókinishke orai, tek qazan aiynyń sońynda aiaqtalady. Birden aityp óteiin, MAES-tyń jylý berýge eshqandaida qatysy joq, jylytý maýsymy turǵysynan eshqandai da problema ol úshin týyndamaidy. Bul energiia júiesine áser etýi múmkin bolǵan soń atap ótip jatyrmyz», — dedi vitse-ministr.
Sonymen qatar, S. Esimhanov stantsiialarda otyn daiyndaý týraly aqparattandyrdy.
«Ońtústik óńirler bizde gazben jylytylady, sondyqtan onda otyn daiyndaýdyń qajeti joq, kelisimsharttar bar. «Qaztransgaz» jetkizedi, artyq suraǵy joq. Kómir boiynsha – bizde kómirmen jylytylatyn 20 iri energetikalyq kásiporyn bar. Qazirgi tańda osy stantsiialarda 4 mln tonna kómir bar. Biyl kásiporyndar aitarlyqtai jaqsy jumys atqardy. Ótken jylmen salystyrǵanda 600 myń tonna kómirge artyq daiyndaldy», — dep atap ótti vitse-ministr.
S. Esimhanovtyń aitýynsha, mynadai normativter bar — kómir razrezderinen energiia kózderiniń qoimalaryna deiingi araqashyqtyq 10-20 táýlik bolýy kerek. Sonymen, búginde barlyq stantsiialardyń kómir qory bar. Máselen, Óskemen JEO-da kómir qory 20 táýlikke deiin bolýy kerek, qazir kómir qory 38 táýlikke jetetin kólemde saqtalýda. Az ǵana kómir tutynýmen sipattalatyn Balqash JEO-na 2-3 aiǵa jetetin kómir jetkizildi.
Elimizde ortalyqtandyrylǵan jylýmen qamtý júiesimen jumys isteitin 460 qazandyq bar. Olardyń ishinde 428-i jylytý maýsymyna daiyn. Ońtústik óńirlerdegi 30-ǵa jýyq qazandyq iske qosý men jóndeý jumystaryn aiaqtap jatyr jáne qazan aiynyń basyna deiin daiyn bolýy kerek.
Osy jyldyń 19 qyrkúiegindegi jaǵdai boiynsha energiia kózderiniń qoimalarynda mazýt qory 101,9 myń tonnany quraidy, bul ótken jylǵy kórsetkishpen salystyrǵanda 24%-ǵa kóp.
Energetika ministrligi qosylǵan qun salyǵy esebimen 100 myń teńge baǵamen 277 myń tonna kóleminde «áleýmettik» mazýt jetkizý kestesin bekitti.
«Jalpy alǵanda, aldaǵy jylý berý maýsymyna daiyndyq turaqty rejimde júrip jatyr», - dep túiindedi energetika vitse-ministri.
