Elorda ákimi Altai Kólginov instagram paraqshasynda qaladaǵy qoǵamdyq seiil qurý oryndaryn qalai keńeitetinin aitty, - dep habarlaidy "Ult aqparat".
«Qala turǵyndarynyń ótinishterin orynaý úshin qoǵamdyq keńistikterdiń (skverler, saiabaqtar, býlvarlar) qajet ekendigin eskere otyryp, biyl olardy keńeitý boiynsha aýqymdy jumystar júrgizip kelemiz. Máselen, B.Momyshuly dańǵyly boiymen jaǵalaýǵa deiin jaiaý júrginshiler jelekjolyn abattandyramyz. Tolqyn tárizdi alleia aýmaǵynda ústel tennisi men shahmatqa arnalǵan ústelder, demalýǵa jáne átkenshek tebýge arnalǵan kóleńkeli aimaqtar ornatýdy josparlap otyrmyz., - dep jazdy ákim.
Shahar basshysynyń aitýynsha, bul Triatlon parkin jańa bórtegúl baǵymen biriktirip, eko-marshrýt qurýǵa múmkindik beredi.
«Byltyr Triatlon saiabaǵyn aýqymdy abattandyrýdy bastadyq. Ótken jyly qalada alǵash ret kópir alańdary abattandyryldy. Saraishyq kóshesindegi kópirdiń astynda sportpen ainalysýǵa arnalǵan birneshe aimaq ashyldy, saiabaq aýmaǵynda fýtbol alańdary ornatyldy. Bul kópir - Triatlon men Prezident saiabaǵy arasyndaǵy kópir, ol biyl óz jalǵasyn tabady», - deidi Altai Kólginov.
Astana ákimi Esildiń ústinen velosipedshiler men jaiaý júrginshilerge arnalǵan kópir salýdy josparlap otyrǵanyn da atap ótti.
«Bul kópir eki saiabaqty – Tuńǵysh Prezident saiabaǵy men Esil ózeniniń boiyndaǵy saiabaqty biryńǵai klastermen biriktirýge múmkindik beredi. Osylaisha qala turǵyndary aýdandar arasynda kedergisiz júre alady. Kópirdiń boiynda demalys aimaqtaryn jabdyqtaimyz, al kópirdiń ishine átkenshek ornatamyz», - dep jazady elorda ákimi.
Sondai-aq, ol shahardaǵy abattandyrý jumystary Prezident Qasym-Jomart Toqaevtyń tapsyrmasy boiynsha iske asyp jatqanyn eske salady.
«Biylǵy kógaldandyrý jumystarynyń ereksheligi aýlalyq aýmaqtardan, saiabaqtardan, skverlerden, býlvarlardan, eldi mekenderden basqa, kórikti jerlerimizdiń irgeles aýmaqtaryn kógaldandyrýǵa kiriskenimizde. Bul «beton oryndar» sanyn azaitady. Mysaly, «Astana Opera» aýmaǵynda emen baǵy, Triatlon saiabaǵynda bórtegúl baǵy, Q.Qýanyshbaev atyndaǵy Qazaq mýzykalyq-drama teatry men «Astana Balet» aýmaǵynda jasyl baq paida bolmaq», - dep túiindedi qala basshysy.
