Qazaqtyń kórnekti aqyny Tumanbai Moldaǵalievtiń biýst eskertkishi óziniń týǵan jeri Eńbekshiqazaq aýdany Esik qalasyndaǵy aýdandyq Mádeniet úiiniń aldyndaǵy alańǵa qoiyldy, dep habarlaidy "Ult aqparat".
Eskertkishtiń ashylý saltanatyna aqynnyń jary Kúltai Qasymqyzy jáne qazaq ádebietiniń kórnekti ókilderi qatysty. Kópshilikti osynaý aitýly oqiǵamen oblys ákiminiń orynbasary Jaqsylyq Omar quttyqtady. Ol «Rýhani jańǵyrý» baǵdarlamasy aiasynda óńirde aýqymdy jumystar atqarylyp jatqanyn aita kelip, Tumanbai aqynnyń eskertkishin ornatý – qazaq poeziiasyna kórsetilgen qurmet ekenin aitty.
«Mádeniettiń ishindegi súbeli oryn – ádebiettiń enshisinde. Qazaq ádebieti óziniń san ǵasyrlyq tarihynda talai talantty tulǵalaryn tanytty. Sonyń ishinde lirik aqyn Tumanbai Moldaǵalievtiń orny erekshe. Onyń daladai darhan, samaldai jumsaq, bulaqtai taza syrshyl óleńderi óz oqyrmanyn izgilikke, adamgershilikke, gýmanistik oilarǵa jetelegeni anyq. Aqynnyń sózine jazylǵan Shámshi Qaldaiaqov, Nurǵisa Tilendiev, Áset Beiseýov syndy kórnekti kompozitorlardyń ánderimen qanshama býyn urpaq ósip, erjetti. Tumaǵańa arnap biýst eskertkish ornatý aqynnyń týǵan topyraǵynyń qazaq poeziiasyna jasaǵan qurmeti, aqynnyń rýhyna bas igendiktiń kórinisi dep bilemin. Barshańyzdy oblys basshylyǵynyń atynan aitýly oqiǵamen taǵy da quttyqtaimyn», - dedi Jaqsylyq Omar.
Aqynnyń jubaiy Kúltai Toqtasynqyzy osyndai igilikti isti atqarýǵa muryndyq bolǵan jerlesterine rizashylyǵyn bildirdi.
«Búgingi qýanyshymdy bir sózge syiǵyzyp aitý múmkin emes. Bul bizdiń otbasymyz úshin ǵana emes, tutas elimiz úshin erekshe oqiǵa. Óz týǵan topyraǵynda beinesi asqaqtap tursa, Tumaǵańdy el-jurtynyń, oqyrmandarynyń umytpaǵany. Búgin erekshe tolqyp turmyn. Eskertkishtiń ashylýyna atsalysqan barlyq azamattarǵa shyn júrekten alǵys aitamyn», - dedi tebirenip aqynnyń zaiyby.
Qazaqstan Jazýshylar odaǵynyń tóraǵasy Nurlan Orazalin Tumanbai Moldaǵalievtiń qazaq poeziiasyn, sóz ónerin damytýǵa qosqan ólsheýsiz úlesine keńinen toqtalyp, aqynnyń esimi zaman ozǵan saiyn jarqyrai túsetinin aitty. Basqosý sońynda jinalǵan qaýym óńir ónerpazdarynyń kontsertin tamashalady.
Atap ótsek, eskertkishtiń eskizdik jobasynyń avtory – sáýletshi, etnodizainer Qurmanǵazy Qadyrov, músinshisi – Altai Beisenov. Aqynnyń biýsti qoladan jasalǵan, tuǵyry mármár tastan daiyndalǵan. Eskertkishtiń biiktigi – 4 metr. Alańy 3,5 ga bolatyn aýmaq 76 mln. teńgege abattandyrylǵan. Munda 70 jaryq baǵanasy, 4 suhbattasatyn oryn, 30 oryndyq ornatylǵan. 1,5 shaqyrymǵa jaiaý júrginshilerge arnalǵan jol tóselgen. 120 Tian-shan shyrshasy, 150-ge jýyq raýshan gúli egilgen.
