Kollaj: Tengrinews.kz
Pavlodardyń eks-ákimi Qairat Núkenov qaryndasy Saltanat Núkenovanyń ólimine qatysty jańa derekti bólisti. Onyń sózinshe, máiitti jýǵan áielder marqumnyń denesin kórip shoshyǵan, - dep habarlaidy Massaget.kz portaly.
Bul týraly ol jýrnalist Bolat Amanbaevqa bergen suhbatynda aitty.
"Saltanat óte jarqyn qyz edi. Oqý ornyn aiaqtady. Óz jumysymen ainalysty. Ol ózin-ózi qamtamasyz etti, bári boldy, eshkimge táýeldi bolǵan joq, bizden eshqashan aqsha suraǵan emes. Bárine ózi jetti. Ashyq edi, bárine kómekteskisi kelip turatyn, bárine qurmetpen qaraityn. Iá, kei blogerler Bishimbaevty aqtap alǵysy keletin shyǵar. Meniń oiymsha, halyqty aldai almaisyń. Olar aq pen qarany ajyrata alady ǵoi. Aqsha úshin istep otyrǵan blogerler adam emes. Meniń oiymsha, mundai sumdyq ózderine tigende túsinetin shyǵar. Olar tipti bloger emes, qalai aitarymdy da bilmeimin. Bishimbaev otbasy óz ulyn qorǵashtai bastady, árine. Biraq biz úshin ol - qubyjyq, qanisher.
...Biz olardy eshqashan keshirmeimiz. Kez kelgen nárseni keshirýge bolady. Iá, abaisyz óltirip alsa, keshirýge bolatyn edi, biraq biz onyń qaryndasymyzdy qalai mazaq etkenin kórip otyrmyz. Bylai barlyq qubyjyq istemeitin de shyǵar. Eger biz keshirsek, ol basqa adamdy óltirip qoiýy múmkin, ol basqa qaiǵyly jaǵdai bolar edi", - dedi Qairat Núkenov.
Ol Bishimbaevtyń óz merziminen buryn bosatylýy múmkin ekenin aitty.
"Aityp turmyn ǵoi blogerlerdi jaldaǵan, tergeý isi de basqasha júrip ketýi múmkin. Onyń aǵzasynda 0,65 promille boldy deidi. Eger adam túnimen ishse de, kýágerlerdiń, inisiniń aiǵaqtary bola tura, tek 0,65 promille tabylǵany birnárseni meńzep tur. Biz oǵan jasalǵan saraptamaǵa kúmánimiz bar. Kóbi ol esirtki qoldandy deidi. Biraq esirtki qoldanǵany rastalǵan joq. Tergeý ony jaýapkershilikten bosatqysy kelip tur", - dedi eks-ákim.
Onyń aitýynsha, máiitti jýǵan áielder qatty shoshyp qalǵan.
"Olar kóp máiit jýǵan. Olar mundai jaraqattardy, deneniń kógergen tustaryn buryn-sońdy kórmegenin aitady. Ol inisin shaqyryp, qaryndasymyzdyń kóz jumǵanyn kútti degen boljam bar. Ol bólmege birneshe ret kirip, onyń ólgenin teksergen, ólgennen keiin ǵana jedel járdem shaqyrǵan. Bul inisi de ólim týraly habarlamaǵany úshin emes, adam óltirýge qatysqany úshin qylmystyq jaýapkershilikke tartylýy kerek. Beinejazbalardy óshirgen adam da Bishimbaevtyń bandasyndaǵy bireý. Onyń bárin sottaý kerek", - dedi ol.
Qairat Núkenovtiń aitýynsha, jantúrshigerlik qylmysqa qatysty jalǵan aqparat tarap jatyr.
"Saltanatty qaralaý arqyly qoǵamda teris pikir qalyptastyryp, Bishimbaevty aqtaý bastalyp ketipti. Qylmyskerdiń aiýandyǵyn dáleldeý úshin máiittiń foto, videosyn jariialaý - sońǵy amal", - dedi ol Bolat Amanbaevqa bergen suhbatynda.
Eske salaiyq, buǵan deiin eks-ministr Bishimbaev áielin uryp óltirdi degen kúdikke ilingeni habarlandy.
Keiin ol ýaqytsha ustaý izoliatoryna qamaýǵa alyndy. Saltanat Núkenovany óltirý deregi boiynsha "Gastro-ortalyq" direktory da ýaqytsha ustaý izoliatoryna qamaldy.
