Foto: A.P. Chehov atyndaǵy qalalyq kitaphananyń instagram paraqshasynan
Belgili aqyn, tanymal sport kommentatory, respýblikalyq «Aq jelken» jýrnalynyń bas redaktory Esei Jeńisulynyń úshinshi jyr jinaǵy «Kókjiektiń arǵy jaǵy - Álem» atty jańa kitaby kópshilikke tanystyryldy, dep habarlaidy Ult.kz.
Esei Jeńisulynyń buǵvn deiin «Bir jaryq», «Sender báriń jaqsysyńdar, adamdar!», «Mynaý ǵaziz dúnie», «Shýaq» atty kitaptary jaryqqa shyqqan. Al myna jańa eńbegi keiingi jeti jyl ishinde kóńilge túigen ishki tolǵanystarynyń jemisi.
«Kópshilik aqyn-jazýshylardy jazǵyrǵysh keledi. Qoǵamda bolyp jatqan dúnielerge ún qatpaidy deidi. Osy kitaptyń betinde sol ýájge jaýap bar. Jinaqqa meniń «Ýaqyt jyrlary» deitin toptama óleńderim kirdi. Onda Jańaózen oqiǵasynan bastap, kiik qyrylǵan kezeń, Arystaǵy jarylys, sý tasqyny, Ýkrainadaǵy soǵys, pandemiia, qańtar oqiǵasy sekildi barlyq qoǵamdaǵy eleýli oqiǵalarǵa óleńderim arqyly ún qosýǵa tyrystym. Aqyndardy jazǵyrýǵa bolmaidy. Kereǵar pikirdi tek aqynnyń shyǵarmasyn oqymaǵandar ǵana aitady. Kitappen tanysqan árbir adam sońǵy jeti jylda qandai ǵumyr keshkenimdi, ne oilap, ne túigenimdi tolyq sezine alady dep oilaimyn», - deidi Esei Jeńisuly.
Aqynnyń jańa jinaǵyna «Ýaqyt jyrlary», «Anam jaily jyrlar», qasietti Mekkege saparynan «Mekke jyrlary» atty óleńder toptamasy men keiingi jyldary jazylǵan ómirshil, adamdarǵa úndeý taqyrybyndaǵy óleńderi engen.
«Óleń negizi jalǵyzdyqtyń týyndysy. Adam ózin jalǵyz sezingende qalamǵa júginip, bar syryn aq qaǵaz jáne qalammen bólisedi. Esei búgin jeti jyldan keiin oqyrmanǵa jańa kitabyn tartý etip jatyr. Aqyn baýyryma aitarym, ádemi álemiń eshqashan kirlemesin», - dedi aqyn Jaras Sársek.
Kitaptyń tusaýkeserine Qazaqstannyń eńbek sińirgen qairatkeri Omar Qiqymov, «Úrker» jýrnalynyń bas redaktory Jaras Sársek, aqyn, aýdarmashy Dáýren Berikqajyuly, jazýshy, satirik Qanat Ábilqaiyr, jazýshy Yrysbek Dábei, “Baldyrǵan” jýrnalynyń bas redaktory Erǵali Baqash, ádebiettanýshy Aqbota Abiyr, BAQ ókilderi men A.P. Chehov atyndaǵy qalalyq kitaphana ujymy men qalyń oqyrman qaýym qatysty.
Aita keteiik, Esei Jeńisulynyń «Kókjiektiń arǵy jaǵy - Álem» atty jańa jyr jinaǵy «Abai» baspasynan 2000 danamen jaryq kórgen.
