Esep komitetiniń otyrysynda Mádeniet jáne sport ministrliginiń jekelegen biýdjettik baǵdarlamalarynyń iske asyrylýy boiynsha júrgizilgen memlekettik aýdittiń qorytyndysy jariialandy, dep habarlaidy QazAqparat.
«Mádeniet jáne sport ministrliginiń qabyldaǵan sharalaryna qaramastan, qazirgi ýaqytta mádeniet salasyndaǵy memlekettik saiasatty iske asyrý máselelerinde birqatar júielik problema bar. Ministrlik bólingen qarajatty tiimdi paidalaný jumysyn jetkilikti dárejede baqylamai otyr. Áleýmettik mańyzy bar jáne mádeni sharalardy ótkizý aiasynda jeke memlekettik satyp alýlardy jariialaǵan kezde áleýetti jetkizýshilerge quqyqqa qaishy talaptar qoiylady. Osylaisha, memlekettik satyp alýǵa qatysýǵa nietti jetkizýshilerdiń sany azaiady», - dedi Esep komitetiniń múshesi Talǵat Jaqan elordada ótken baspasóz máslihatynda.
Onyń aitýynsha, ulttyq kinoindýstriiany qoldaý sharalarynyń olqylyqtary barshylyq.
«Jańadan qurylǵan «Ulttyq kinony qoldaýdyń memlekettik ortalyǵy» aktsionerlik qoǵamynyń biryńǵai operatoryn qarajatpen qamtý memlekettik biýdjettiń esebinen júzege asyrylady. Sonymen birge bul ortalyqtyń basqa kiris kózi joq», - dedi Talǵat Jaqan.
Onyń aitýynsha, osy jyldyń naýryz aiynda qurylǵan ortalyqtyń shyǵyny 2019 jyldyń 1 qazanyndaǵy jaǵdai boiynsha 126,6 mln teńgege jetken. Al oǵan negizinen 2 mlrd 460 mln teńge bólingenimen atalǵan somanyń 5,1 paiyzy ǵana igerilip otyr. Qalǵan aqshanyń igerilmei qalatyn túri bar.
«Onyń ústine Kino ortalyǵy ashylǵaly sarapshylar keńesiniń bir ǵana otyrysy ótken», - deidi ol.
