Erjan Maksim Polshada ótetin Junior Eurovision halyqaralyq baiqaýyna attandy, – dep habarlaidy «Habar 24» telearnasy.
Almaty áýejaiynda ánshini týǵan-týystary men jankúierleri shyǵaryp saldy. Olar áýejaiǵa eki saǵat buryn kelgen. Jas talant bul baiqaýǵa tyńǵylyqty daiyn ekendigin aitady. Ol Polshaǵa jetken soń kúnine 2-3 saǵattan jattyǵýdy josparlap otyr.
«Maǵan Disneidiń kóbinese mýltfilmderi unady. Sondai óleńderge uqsatyp jazyldy. Endi Junior Eurovision-ǵa deiin kóptegen daiyndyqtar bolady» dedi ol.
E.Maksimniń ákesi onyń jeńiske jetetininen úmitti.
«Erjanǵa senemiz. Qolynan kelgenshe óziniń bar talpynysyn salady degen oidamyz. Úmittemiz. Jaqsy bir jetistikke jetedi degen oidamyz. Bári ońynan bolsyn dep tileimiz» deidi Erbol Maksimuly.
Aita keteiik, Erjan Maksim Eurovision baiqaýyna arnaiy án jazdyryp, oǵan beineklip túsirdi. Al tikelei konkýrs kúnderi kórermenderge túrli sahnalandyrylǵan qoiylymdar usynylmaq. Eske salsaq, oraldyq ánshiniń atalmysh halyqaralyq baiqaýǵa qatysatynyn buǵan deiin habarlaǵan bolatynbyz.
10 qazan kúni ol Almatyda baspasóz máslihatyn ótkizip, baiqaýǵa arnalǵan «Armanyńnan qalma» ániniń beinebaianyn kórsetti. Onyń rejisseri - Aleksandr Flomboim, prodiýseri - Sergei Rýtskii. Ánniń avtorlary - Hamit Shanǵaliev, Daniiar Aldabergenov jáne Timýr Balymbetov. 15 qarasha kúni Nur-Sultanda ótken baspasóz máslihatynda Erjan sahnaǵa neshinshi nómirmen shyqqysy keletinin aitty.
«Habar» agenttiginiń basqarma tóraǵasy Erlan Bekhojinniń aitýynsha, biyl baiqaýǵa negizinen Eýropalyq odaq elderiniń ókilderi qatysady. Ázerbaijan men Túrkiia óz kandidattaryn usynbaǵandyqtan, Erjan búkil túrki álemniń atynan óner kórsetetin bolady. Junior Eurovision mýzykalyq baiqaýynyń ashylý rásimi 18 qarasha kúni ótip, jas ánshiler jerebe tartady. Sol arqyly sahnaǵa shyǵatyn rettik nómirleri anyqtalady. 24 qarashada bolatyn finaldyq kezeńdi «Habar» telearnasynan tikelei efirden kórýge bolady.
Jeńimpazdy telekórermenderdiń daýys berýi men quramyna 3 eresek jáne 2 bala kiretin baiqaýǵa qatysýshy elderdiń tóreshileri anyqtaidy. «Junior Eurovision» alǵash ret 2003 jyly Daniianyń Kopengagen qalasynda ótti.
Biylǵy baiqaýǵa 19 elden órender qatysady. Al Qazaqstan bairaqty básekege alǵash ret 2018 jyly Minskide (Belarýs) qatysty. Elimiz atynan «Ózińe sen» ánimen Daneliia Tóleshova óner kórsetip, altynshy orynǵa ie boldy. Bas júlde polshalyq Roksanna Vengelge buiyrdy. Ekinshi oryndy Frantsiia ánshisi Angelina, úshinshi oryndy avstraliialyq Djael Ýena jeńip aldy.
