28 maýsymda elorda turǵyndary jas daryn Erjan Maksimniń airyqsha shoý-kontsertiniń kýágeri bolady, dep habarlaidy "Ult aqparat" Mádeniet jáne sport ministrliginiń baspasóz qyzmetine silteme jasap.
Mádeniet jáne sport ministrligi elorda kúnine orai «Golos. Deti» jobasynyń jeńimpazy Erjan Maksimniń alǵashqy debiýttik kontsertin daiyndaýda.
«Oryndaýshynyń jasy jeke kontsertti ótkizýge esh kedergi emes, Erjan bul iske úlken jaýapkershilikpen daiyndalýǵa kiristi. Qazirgi tańda jas daryn Qazaqstannyń eńbek sińirgen qairatkerleri Ulyqpan Joldasov jáne Renat Gaisin syndy kompozitorlarmen kompozitsiia jazý ústinde. Bul - Erjannyń repertýaryndaǵy alǵashqy avtorlyq ánder. Atalmysh shyǵarmalardy jeke kontsertke kelgen kórermender alǵashqylardyń biri bolyp tyńdaidy» delingen habarlamada.
Keshtiń repertýarynda N. Nazarbaevtyń «Otan-Ana», E. Karmenniń «All by Myself», M. Magomaevtyń «Siniaia vechnost» kompozitsiialary jáne ózge de týyndylar «Solister akademiiasy» Memlekettik kameralyq orkestriniń súiemeldeýimen shyrqalady.
Sáken Maiǵaziev, Ulyqpan Joldasov, Renat Gaisin, Aiqyn Tólepbergen, Móldir Áýelbekova, Ábdijappar Álqoja syndy qazaqstandyq oryndaýshylar Erjanǵa qoldaý kórsetip, jas darynmen birge án shyrqaidy.
«Keshtiń repertýarymen ǵana emes, sonymen qatar oryndaýshynyń kórermender aldyna shyǵatyn sahnalyq obrazymen de egjei-tegjeili jumys jasalýda. «Zeken Moda» brendiniń avtory Qairolla Ábishev Erjannyń airyqsha kostiýmderin daiyndap jatyr. Bir aita keteri, naqty osy dizainer Dimash Qudaibergenniń Londondaǵy kontserti men Los-Andjelestegi «The World's Best» (AQSh) konkýrsyndaǵy kostiýmderin tigip bergen edi» dep málim etti ministrlikten.
Budan buryn Erjan Maksim astanalyq balalar úii men «SOS balalar aýylyna» baryp, tárbielenýshilerge alǵashqy kontsertine shaqyrý biletterin óz qolymen úlestirdi. Artynan jas daryn «Mýz»TV-2019 júldesine qonaq retinde qatysyp, sahna syrtynda reseilik estrada juldyzdarymen bir sahnada óner kórsetti.
Erjannyń bolashaqqa jospary kóp. Qazirgi ýaqytta «Habar» agenttigi Erjan Maksim jaiynda derekti film túsirýdi qolǵa aldy.
Esterińizge sala keteiik, 28 maýsymda saǵat 19-00-de qazaqstandyq oryndaýshy Erjan Maksimniń alǵashqy jeke kontserti ótedi. Biletterdi qala kassalarynda jáne BiletiAstani.kz. saitynan alýǵa bolady.
