Mádeniet jáne sport ministri Aqtoty Raiymqulova «Balalar Evrovideniesi» baiqaýynda ekinshi oryn alǵan qazaqstandyq ánshi Erjan Maksimmen kezdesti, – dep habarlaidy «Ult aqparat».
Aldymen Aqtoty Raiymqulova jas ánshini júldeli orynǵa ie bolýymen quttyqtap, izgi tilegin bildirdi.
«Qazaqstanǵa syi alyp kelgen kishkentai Erjan balamyzdy quttyqtaimyz. Jetistikterge jete ber. Júzden júirik shyqqanyńa myń da bir alǵys. Bul – úlken jumystyń nátijesi. Elimizdiń týyn, mártebesin kótergeniń úshin saǵan kóp raqmet» dedi ministr.
Sonymen qatar, ministr jas ánshige «Qazaq eli» shaǵyn músinin syiǵa tartty. Osy oraida Erjan Maksim baiqaý kezinde basynan ótken qyzyqty oqiǵany aityp berdi.
«Maǵan osylai qurmet kórsetip jatqanyńyzǵa kóp rahmet! Baiqaýda óte qiyn boldy. Biraq eń qyzyǵy baiqaýda meniń qulaǵyma qulaqqap syimai qaldy. Keiin ony skotchpen qulaǵyma jabystyryp tastadym. Taǵy da kóp qyzyqtar boldy. Balalardyń bári keshke qarai birge kóńil kóterip, vals biledik. Qarsylastarym óte myqty boldy» deidi jas ánshi.
Aita keteiik, «Balalar Evrovideniesi 2019» baiqaýy Polshanyń Glivitse qalasynda ótti. Oǵan 18 eldiń ókilderi qatysty. Erjan Maksim sahnaǵa «Armanyńnan qalma» ánimen shyqty.
Belarýs, Grýziia, Niderlandy, Polsha, Serbiia, Ýkraina jáne Ýelstiń kásibi mýzykanttary qazaqstandyq jas ánshige ball berip, qoldaý kórsetti.
Nátijesinde, Erjan Maksim ekinshi oryn ielendi. Bul saiysta polshalyq Viktoriia Gabor jeńiske jetti. Úshinshi oryn ispaniialyq Melani Garsiiaǵa buiyrdy.
