Ertis ózeniniń qazaqstandyq bóliginde kemeler tolassyz júretin bolady. Bul týraly halyqqa esep berý kezdesýinde QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Ózen kóligi salasynda qazirgi ýaqytta Reseimen ekijaqty tasymaldardy keńeitý is-sharalary qabyldanyp jatyr. 2021 jyldyń ózinde ózen kóligimen 350 myń tonna qiyrshyq tas, qurylys materialdaryn tasymaldaý josparlanǵan. Qytaimen mýltimodaldyq qatynasty uiymdastyrylady. Bul rette Ertis ózeniniń qazaqstandyq bóligi boiynsha tolassyz keme qatynasyn qamtamasyz etý úshin keme qatynasy shliýzderin kúrdeli jóndeý boiynsha jumystar júrgizilýde», - dedi ministr.
Onyń atap ótýinshe, Reseimen sý kóligi qatynasyn damytýǵa ótken jyly Eýraziialyq odaq aiasynda qabyldanǵan Keme qatynasy týraly kelisimniń ratifikatsiialanýy yqpal etedi.
«Tutastai alǵanda, ishki sý joldarynda qabyldanyp jatqan sharalar 2025 jylǵa qarai ózen tasymaldarynyń kólemin 3,8 mln tonnaǵa deiin jetkizýge múmkindik beredi», - dedi Beibit Atamqulov.
