Ertis ózeninde sý deńgeii kóterildi. Osyǵan bailanysty Semei qalasynyń ákimi Ermak Sálimov túsinik berdi, dep habarlaidy "Ult aqparat" Semei aqparat ortalyǵyna silteme jasap.
Semeide sý tasqyny qaýpi týyndady, biraq tótenshe jaǵdai rejimi joq. Bul týraly brifingte qala ákimi Ermak Sálimov aitty. Búgingi kúni sý deńgeii - 478 sm, al Semei úshin kritikalyq deńgei - 450 sm.
Alaida mamandar bul tótenshe jaǵdai emes ekenine sendirdi.
«12 qańtarda tańerteńgi saǵat 8:00-den keshki 20:00-ge deiin sý saǵatyna 5,3 sm kóterilgen. Ár saǵat saiyn sý osy deńgeige kóterilip otyrdy. 13 qańtarda tańǵy segizden keshki segizge deiin sý saǵatyna 1,6 sm kóterildi. Búgin tańǵy 8:00-den bastap sý saǵatyna 1 sm kóterilip keledi. Iaǵni sý azaiyp barady», - dedi qala basshysy.
Sarapshylar túsindirgendei, sý deńgeiiniń kóterilýine tómengi muzdyń jinalýy sebep bolǵan. Bul - ózen túbinde muz jinalýyna, aǵynnyń qozǵalysyna kedergi keltirip, sý deńgeiiniń kóterilýine ákeletin tabiǵi qubylys. Sonymen qatar, ol muz sý astynda bolǵandyqtan, mamandar onyń ornalasqan jerin baqylai almaidy.
Dengenmen, sarapshylar bul protseske aralasyp, jarylys jumystaryn júrgizýge qarsy.
- Muz sý astynda qalyp, sý aǵysynyń erkin ótýine múmkindik bermei jatyr. Sonymen qatar, astyndaǵy muzdyń qai jerde turǵany bizge kórinbeidi. Sý ózdiginen aǵyp ketpeiinshe ol da ketpeidi. Buǵan biz aralaspaýymyz kerek, - deidi Ertis bassein inspektsiiasynyń mamany Valentina Peschannikova.
Sý basýy múmkin aýmaqtar - Pristan, Beibitshilik araly, Vostochnyi jáne Mirnyi kentteri. Osy aimaqtarda qazirgi tańda 760 adam turady.
«Esh qaýip joq, biraq biz kez kelgen jaǵdaiǵa daiynbyz. Turǵyndarǵa yqtimal qaýip týraly eskertilgen. Olardy oqys jaǵdaida qaida ornalastyratynymyzdy bilemiz. Avtobýstar bólinedi. Turǵyndardy «Semei» jáne «Týrist» qonaqúilerine jaiǵastyramyz, kelisimder bar», - dedi Ermak Sálimov.
Qazirgi ýaqytta azamattyq qorǵanys kúshteri joǵary daiyndyqta jumys istep jatyr jáne nysandarda táýlik boiy kezekshilik etedi.
Sondai-aq, oblys ákimi Danial Ahmetovtiń tapsyrmasymen mamandar Ertis jaǵdaiyn zerdelep, odan arǵy áreketter týraly sheshim qabyldaý úshin ózenniń boiyn tikushaqtan qarap shyǵady.
