Erteń Nur-Sultan ýaqytymen saǵat 17:00-de onlain formatta Túrki tildes memleketter yntymaqtastyq keńesiniń beiresmi sammiti ótedi. Bul jaiynda Prezidenttiń baspasóz hatshysy Berik Ýáli málim etti, dep habarlaidy "Ult aqparat".
«Erteń, 31 naýryz kúni Nur-Sultan qalasynyń ýaqyty boiynsha saǵat 17:00-de onlain formatta Túrki tildes memleketterdiń yntymaqtastyq keńesiniń beiresmi sammiti ótedi. Beiresmi sammitti Memleket basshysy Qasym-Jomart Toqaev ashyp, júrgizedi. Jiynǵa Qazaqstan Respýblikasynyń Tuńǵysh Prezidenti – Elbasy Nursultan Nazarbaev, Túrkiia Prezidenti Rejep Taiip Erdoǵan, Ázerbaijan Prezidenti Ilham Áliev, Ózbekstan Prezidenti Shavkat Mirziioev, Qyrǵyzstan Prezidenti Sadyr Japarov, Túrikmenstan Prezidenti Gýrbangýly Berdimuhamedov, Vengriia Premer-ministri Viktor Orban, Túrki tildes memleketterdiń yntymaqtastyq keńesiniń Bas hatshysy Baǵdad Ámireev qatysady» dep jazdy Berik Ýáli Facebook paraqshasynda.
Onyń aitýynsha, jiyn barysynda baýyrlas memleketter arasyndaǵy saýda-ekonomikalyq, mádeni-gýmanitarlyq salalar boiynsha yntymaqtastyq jáne ony odan ári damytý máseleleri talqylanady.
«Sammit qorytyndysy boiynsha túrki elderiniń mádeni qundylyqtaryna jáne Keńestiń mártebesine qatysty deklaratsiia qabyldanady dep josparlanyp otyr» deidi Prezidenttiń baspasóz hatshysy.
