Áleýmettik jelide belgili ádebietshi, ǵalym Tursynbek Kákishevtiń eski videosy tarady.
Onda Kákishev qazaq eliniń ereksheligin aityp, qalai qazaq halqy qoǵamdyq tártipti sózben rettep otyrǵanyna mysal keltirdi. Sosyn, áli kúnge sheiin Reseige arqa súieitinimizdi jetkizdi.
"Qazaqtyń synamaityn dúniesi joq. Daiyn kiip otyrǵan kóilegiń bar ǵoi? Osydan min tabady. Ana jerine birdeńe qoimaǵan, myna jerine birdeńe qoimaǵan dep, minshil, synshyl halyqpyz. Ol jaǵynan kelgen ýaqytta, biz - kóp elge qaraǵanda óz estetikalyq tanymymyz ben biligimiz bar. Ol - aýyz ádebietiniń kúshtiliginen. Qazaq dalasynda bir túrme, bir úide qulyp bolǵan joq. Nemese, ury-qarysy bolmap pa? Bolǵan bári de. Biraq sonyń bárin sózben ustap, sózben jónge salyp otyrǵan. Osy jaǵynan alyp qarǵanada, Eýropatsentristik kózqarastyń eń nadandyǵy - bilmeitindiginiń nátijesinde biz ózimizdi ózimiz qor qylyp kórsetip keldik. Qazir, áli kúnge sheiin mynaý Rossiiasyz kún kóre almaityn siiaqtymyz. Qazirdiń ózinde Tamojennyi soiýzǵa da kirdiń, odaqqa da kirip jatyrsyń. Erteń ákeńnen tanytyp, jelkeńnen qysyp otyrǵanyn taǵy kóresiń. Oǵan da kónesiń..." -deidi Tursynbek Kákishev KUN.KZ taratqan videoda.
Tursynbek Kákishev - ádebietshi, ǵalym, synshy, Filologiia ǵylymdarynyń doktory, professor, Qazaqstan Respýblikasynyń eńbek sińirgen ǵylym qairatkeri. Onyń «Dáýir sýretteri», «Syn sapary», «Ońasha otaý» jáne «Qazaq ádebietiniń tarihy» syndy zertteý kitaptary, Sáken Seifýllinge arnalǵan birqatar kitaptary jáne basqa da shyǵarmalary jaryqqa shyqqan. Ol 1927 jyly týyp, 2015 jyly dúnieden ozdy.
