Ánshi Roza Rymbaeva «Vitebsktegi Slavian bazary» halyqaralyq óner festivalinde Qazaqstannyń atynan shyǵatyn Ernar Sadyrbaevty taǵy bir ánshi Ernar Aidarmen salystyrmaýdy ótindi. Ol týraly Qazaqstannyń halyq ártisi OKQ-da ótken baspasóz máslihatynda aitty, dep habarlaidy QazAqparat tilshisi.
Baspasóz máslihaty barysynda tilshilerdiń biri biylǵy «Slavian bazarynda» Qazaqstannyń namysyn qorǵaityn Ernar Sadyrbaevqa «Ernar Aidardan keiin qanshalyqty tanymal bolamyn dep oilaisyz? Qoryqpaisyz ba?» degen suraq qoidy.
Jiyn barysynda Ernar Sadyrbaev (án áleminde «Ámire» atymen belgili - avtor) bul suraqqa jaýap berýden bas tartyp, Roza Rymbaeva sóz tizginin ustady.
«Meniń oiymsha, ánshiniń atyn shyǵaratyn - ol onyń áni, shyǵarmashylyq óneri. Ernar Aidar men «Ámireni» salystyrýǵa bolmaidy. Men maman retinde aitaiyn. Ernar Aidar - ózbektiń nemese túriktiń ánderin qazaqsha oryndap júrgen toidyń ánshisi. Al bizdiń myna balamyz - búgingi Ernar konkýrsqa qatysatyn ánshi. Konkýrsqa qatysý - óziniń deńgeiin halyqaralyq deńgeide kórsetý, shyǵarmashylyǵyn sol formatqa sáikes keletin halyqaralyq oryndaýshy jastarmen saiysqa túsý. Ondai jastardyń arasynda saiysqa túsýdiń ózi - deńgei. Al endi eger seniń shyǵarmań kem túspei, artyq bolyp tursa - ol Qazaqstan mádenietiniń deńgeiiniń joǵary bolǵandyǵy. Sondyqtan, ana Ernarmenen myna Ernardy salystyra almaimyn, keshirińizder», - dedi Roza Rymbaeva.
Aita ketsek, Vitebsktegi «Slavian bazary» halyqaralyq óner festivali Belarýs memleketin dúnie júzine tanymal etti. 1995 jyldan bastap festival Belarýs Respýblikasynyń prezidenti Aleksandr Lýkshenkonyń jeke qoldaýymen halyqtar arasynda mádeniet dialogynyń qalyptasýyna yqpal etip keledi. Festival kúnderi dástúrli túrde odaqtas memleketter kúni, Belarýs, Resei, Ýkraina elderiniń óner ieleriniń gala kontserti, «Shekarasyz festival», «Teatr kezdesýleri», «Juldyzdy sát» baǵdarlamalary ótkiziledi.
Atalǵan festivalde Qazaqstannyń Halyq ártisi Roza Rymbaeva men ánshi Dimash Qudaibergen tórelik etetin bolady.
Aita ketsek, Dimash Qudaibergen 2015 jyly Vitebskide ótken «Slavian bazary» halyqaralyq án festivalinde bas júldeni ielengen bolatyn.
