QR Prezidenti Qasym-Jomart Toqaevtyń Jarlyǵymen Ermuhamet Ertisbaev elshi qyzmetinen bosatyldy, dep habarlaidy "Ult aqparat" Aqordaǵa silteme jasap.
«Memleket basshysynyń Jarlyǵymen Ermuhamet Qabidenuly Ertisbaev Qazaqstan Respýblikasynyń Belarýs Respýblikasyndaǵy Tótenshe jáne Ókiletti Elshisi qyzmetinen, TMD Jarǵylyq organdarynyń janyndaǵy Turaqty Ókil qyzmetin qosa atqarýdan bosatyldy», delingen habarlamada.
Ermuhamet Qabidinuly 1956 jyly 19 qarashada Qaraǵandy oblysynda dúniege kelgen.
Qaraǵandy memlekettik ýniversitetin bitirgen. Saiasattaný ǵylymdarynyń doktory, professor. Jumys tájiribesin 1978 jyly Jezqazǵan pedagogikalyq institýtynda assistent bolyp bastaǵan. Sovet áskeri qatarynda áskeri qyzmet ótedi. Lomonosov atyndaǵy MMÝ-de mashyqtanýshy-oqytýshy boldy, sonda aspirantýrany bitirip, dissertatsiia qorǵaǵan. Saiasat tarihy kafedrasynyń meńgerýshisi boldy.
Birneshe monografiia men júzdegen ǵylymi jáne pýblitsistikalyq maqalanyń avtory. 1990-1994 jyldary – QR Joǵary Keńesiniń depýtaty.
1994-1998 jyldary - Qazaqstannyń Sotsialistik partiiasy saiasi atqarý komitetiniń hatshysy. 1994-1998 jyldary - Qazaqstan Respýblikasy Prezidentiniń keńesshisi. 1998-2000 jyldary - Qazaqstan strategiialyq zertteý institýtynyń direktory. 2000 jyly Memleket basshysy Ákimshiliginiń bólim meńgerýshisi bolyp jumys istedi.
2002 jyly Qazaqstan Respýblikasy Prezidentiniń keńesshisi. 2006 jyly qańtar aiynan bastap QR Mádeniet, aqparat jáne sport ministri. 2006-2008 jyldary QR Mádeniet jáne aqparat ministri. 2008 jyly mamyr aiynan Qazaqstan Respýblikasy Prezidentiniń keńesshisi. QR Prezidenti janyndaǵy memlekettik saiasat jónindegi Ulttyq keńestiń múshesi.
2013-2017 jyldary QR-nyń Grýziiadaǵy Tótenshe jáne Ókiletti elshisi boldy.
2017 jyldyń qarashasynda Qazaqstan Respýblikasynyń Belarýs Respýblikasyndaǵy Tótenshe jáne Ókiletti elshisi, TMD jarǵylyq organdary janyndaǵy turaqty ókili bolyp taǵaiyndaldy.
«Qurmet», «Parasat»» jáne III dárejeli «Sińirgen eńbegi úshin» (Ýkraina) ordenderimen, «Astanaǵa 10 jyl» merekelik medalimen marapattalǵan.
