Qazaqstan - syrtqy saiasi arenada jaýy joq álemdegi sanaýly eldiń biri. Bul týraly saiasi ǵylymdar doktory Ermuhamet Ertisbaev aitty, dep habarlaidy QazAqparat.
Búgin Sputnik Qazaqstan aqparat agenttiginiń Facebook paraqshasynda ótken videokópir barysynda «Qazaqstanda ulttyq jáne dini máseleler qalai sheshiledi? Qazaqstanda radikaldy islam men ultshyldyq bar ma? Qazaqstandaǵy orys mádenieti úshin qaýip bar ma?» degen saýaldar qoiylǵan bolatyn.
«Jumsartyp aitqanda Reseimen belgili bir deńgeide shielenis bolǵan elderdi qazir atap ótpei-aq qoiaiyn. Menińshe, shielenis oilanbai júrgizilgen til saiasaty men tarihi shyndyqty burmalaýǵa tyrysýdan týyndaǵan. Bul - túbegeili anyq jait. Osy turǵydan alǵanda saiasatker ári saiasattanýshy retinde bizde munyń bári tyńǵylyqty oilastyrylǵanyn atap óte alamyn. Bizde qazaq tili - memlekettik til, al orys tili – ultaralyq qarym-qatynas tili. Konstitýtsiiada ol memlekettik tilmen birdei qoldanylady dep bekitilgen. Esimde, 1997 jyly bir top depýtattarymyz Konstitýtsiialyq keńeske «Birdei sózi neni bildiredi?» degen saýalmen júgingen bolatyn. Konstitýtsiialyq keńes «birdei sózi memlekettik tildegidei mártebege ie» dep naqty jaýap berdi. Osy rette Elbasy Nursultan Nazarbaev TMD-niń ózge respýblikalarynda aýmaq joǵaltýǵa, týrasyn aitqanda soǵysqa alyp kelgen qatelikterden jaltarýymyzdy jiti qadaǵalap otyrdy», - dedi saýalǵa jaýap bergen Ermuhamet Ertisbaev.
Sonymen qatar ol Qazaqstan elordasy dini konfessiialardyń dialog alańyna ainalǵanyn, búkil álemniń din ókilderi sezde bas qosatyndyǵyn atap ótti.
«Bul da - Nursultan Nazarbaevtyń bastamasy bolatyn. Syrtqy saiasat – ishki saiasattyń jalǵasy. Bul - jalpyǵa málim fakti. Eger biz eldiń ishinde ultaralyq kelisimdi, etnosaralyq, konfessiiaaralyq dialogty únemi resmi málimdep otyrsaq, onda bul syrtqy saiasatta da kórinis tabady. Qazaqstan - syrtqy saiasi arenada jaýy joq álemdegi sanaýly elderdiń biri. Islam fýndametalizmine qatysty aitar bolsam, bizde ózge elderdegidei úlken qaýip joq. Biz ulttyq qaýipsizdikke basymdyq beremiz. Bul - memlekettiliktiń birinshi baǵany. Tiisti qyzmetter men Ulttyq qaýipsizdik komiteti naqty jumys júrgizip jatyr. Bizde de islam fýndamentalizmi, terrorizm faktileri oryn alǵanymen, der ýaqytynda joly kesildi. Menińshe, bul aitarlyqtai qaýip sanalmaidy. Degenmen, tamyr búlkilin baqylaýda ustap otyrmyz», - dedi spiker.
