Qazaqstan kinematografisteri odaǵynyń tóraǵasy, rejisser Ermek Tursynov otandyq kinonyń keleshegi týraly sóz qozǵap, «Qazaqfilmge» bailanysty vainer Meiirjan Tórebaevtyń synyna jaýap berdi, dep habarlaidy QazAqparat.
«Qazirgi ýaqytta búkil shoý-biznes, búkil KVN, ánshiler kinoǵa lap qoidy. Al men olardyń ónimderin bes minýttan artyq ýaqyt qarai almaimyn.
...Áleýmettik jelide bir vainerdiń (M. Tórebaev) videosy júr. Birinshiden, jalpy, ol vainer qalaisha ol minberge tap boldy? Ekinshiden, ol bir sózimen búkil kinematografister odaǵyna til tigizip otyr. Al, men odaqtyń basshysy bolǵandyqtan, ózimizdi qorǵaǵym keledi», - deidi Ermek Tursynov Astanada ótken QR Mádeniet jáne sport ministrliginiń keńeitilgen alqa májilisinde.
Rejisserdiń aitýyna qaraǵanda, kino týraly talqylanatyn bolsa, eń aldymen Asanáli Áshimov sekildi halyq moiyndaǵan azamattardy tyńdaý kerek.
«Men sol vainerge jaýap bergim keledi. Bári bir-birimen bailanysty. Búgin túsirilip jatqannyń bári kino emes. Kitap dúkenine túsip jatqannyń bári de ádebiet emes, bylaisha aitqanda... Ol jaqqa kirseń, Muhtar Áýezov, Muqaǵalilardy kóresiń. Al, qalǵandary... Biz mynda bárimiz - oblystyq mádeniet basqarmalary basshylary túgel jinaldyq. Ne degim keledi: jastarmen kezdesý kerek. Adamdardy shaqyrý kerek. Olardyń bári de áleýmettik jelide. Biz bolsaq, áńgimeni osynda talqylap jatyrmyz», - deidi rejisser.
Ermek Tursynovtyń aitýynsha, qazirgi ziialy qaýym ókilderi jastarmen áleýmettik jeli arqyly tildese bilýi kerek.
«Meniń oiymsha, ult mádenieti - jastardyń óz tarihyna kózqarasymen ólshenedi. Ótkenge tas atýǵa bolmaidy. Ol Sháken Aimanovty da, Sultan Qojyqovty da aiamady. Bizdi qoishy... Bizde kino bar. Daryndy jastar jeterlik. Jannat Alshanova, Daniiar Salamat degen myqty jastar ósip keledi. Olardy eshkim tani da bermeidi. Sebebi, olar uiań ári eńbekqor», - dep túidi sózin rejisser.
