Belgili kinorejisser Ermek Tursynov otandyq kinoónimderdi synǵa aldy. Bul týraly ol óziniń Facebook paraqshasynda jazdy.
Ermek Tursynov óz jazbasynda búgingi otandyq kinotýyndylardyń jai-kúiine toqtaldy.
«Barlyq shoý-biznes ókilderi kino álemine kelip jatyr. Keshegi KVN oiynshylary men basqa da media juldyzdar búginde jyl saiyn kino túsirip, jarysa tusaýkeser jasaityn bolǵan. Bir týyndynyń izin sýytpai, artynsha jańa filmniń afishasy shyǵyp jatady. Otandyq teleónimniń sany artqany árine, jaqsy. Alaida kino álemi oiyn alańy emes. «Ókinish», «Sisitai», «Toi liýboi tsenoi», «Jena ne stena», «Brat ili brak», «Uly dala komediiasy», «Glamýr dlia dýr» sekildi kóptegen filmderdi naǵyz film deýge kelmeidi», delingen jazbada.
Sondai-aq ol ádebiet salasyndaǵy olqylyqtardy da atap ótti.
«Media juldyzdar kino túsirýmen ǵana emes, kitap jazýmen de ainalysatyn bolǵan. Mysaly Almatyda ótken kitap festivalinde ádebiet salasyndaǵy bas syilyqty Baian Alagózova aldy. Baian eger jazýshyǵa ainalsa, men onda ózimdi arhiepiskop der edim. Qoǵam ishinde mundai qubylys ornatqandar kóp. Qairat Nurtas, Búrkit, Nurtas Adambai, Tóreǵali Tóreáli, Sivi Mahmýdi sekildi bir top juldyzdar shyǵarmashylyq álemdi biznes, saýda ortalyǵyna ainaldyrdy», dedi ol.
Sonymen qatar ol filmdi kassadan qyrýar qarjy jinaý úshin emes, qoǵamǵa oi salý úshin túsirý qajet ekenin aitady.
«Kino áleminen marketingti kórýdiń qajeti joq. Ol ózinshe bólek shyǵarmashylyq pen biik mádeniettiń belgisi. Sondyqtan da shynaiy dúnieni ádemi etip kórsetý kerek. Bizdiń naǵyz qaharmandar kóp jaǵdaida kadr syrtynda qalyp qoiady. Mysaly qanshama adamnyń ómirine arasha bolǵan kardiohirýrg Iýrii Pia, 2016 jyly apatty jaǵdaida 116 jolaýshysy bar ushaqty sátti qondyrǵan Dmitrii Rodin sekildi aramyzdaǵy talantty jandar jaiynda film túsirilse, kórermeni kóp bolar edi. Telearnalardan eshkimge qajeti joq juldyzdardyń ómirin úlgi etýdi doǵarý qajet», delingen jazbada.
