Májilis depýtaty Káribai Musyrman Soltústik Qazaqstan oblystyq til janashyrlarymen kezdesti. Oblystyq Aqsaqaldar alqasynyń tóraǵasy Bolat Saǵyndyqov aqsaqal uiymdastyryp, oblystyq «Nur Otan» partiiasynyń ǵimaratynda bolǵan osy kezdesýde kóptegen máseleler ashyq aitylyp, ókpe-nazdar taýdan qulaǵan seldei aqtaryldy.
Sonyń ishinde qazaq tiliniń azyp bara jatqany, qazaqsha oqytatyn mektepterdiń ózinde balalardyń tek oryssha sóileitindigi, mektep basshylyǵynyń ana tilinde sóileýdi talap etpeitini - ata-analar men til janashyrlary tarapynan narazylyq otyn týdyrdy. Sózdiń qorytyndysynda jinalǵandar «Til týraly» zańdy qataityp, ony Prezident Q.Toqaev talap etken «etnosaralyq qatynas tili» deńgeiine jetkizý qajettigi aityldy.
Til janashyrlaryn tek Memlekettik tildi damytý basqarmasynyń bastyǵy Kemel Ospanov jariialaǵan keibir aqparattar ǵana sabasyna túsirip, rizashylyqtarǵa bóledi. Sonyń ishinde Kemel Qarashauly qaladaǵy Óner kolledjine ataqty jerlesimiz Ermek Serkebaevtyń esimi beriletin boldy degen aqparatqa jinalǵandardyń bári serpilip qaldy. Alaida bul áli túpkilikti sheshilmegen másele eken, ázirge ol Bilim men ǵylym, Mádeniet jáne Ádilet ministrligi qoldapty. Endi qalǵan biýrokratiialyq kedergilerden ótýi kerek eken. Sonsha qiyndatyp, eshqandai qatysy joq ministrlikter men vedomstvolardyń kelisimin alýdyń keregi joq edi degen sózdi sheneýniktiń ózi de aityp qaldy.
Sonymen birge biyl Soltústik Qazaqstannyń aýyl-selolarynda 276 kósheniń attary ózgertiletin bolypty. Bular keshegi «kún kósemder» men olardyń áielderi men jandaishaptarynyń atymen atalǵan kósheler. Solardyń bári endi ǵana ózgertilip, durys jolǵa salyna bastaǵan eken.
"Egemen Qazaqstan"
