- Sidnei Olimpiadasynyń chempiony, tanymal qazaqstandyq maman Ermahan Ybraiymov Rio-de-Janeiro Olimpiadasyndaǵy qazaqstandyq boksshylardyń aiaq alysyn muqiiat baqylap keledi.
Qazaqstan boks federatsiiasynyń resmi saýalyna bergen suhbatynda tanymal sportshy Braziliia Olimpiadasyndaǵy qazaqstandyq boksshylardyń múmkindikteri týraly aityp berdi.
«Biylǵy Olimpiadada bizde óte jaqsy komanda jasaqtaldy», - deidi Ermahan Ybraiymov. - Barlyq jigitter jaqsy daiyndalypty jáne jalpy osy Olimpiadada ádemi boks kórsetip keledi. Árine, Berik Abdrahmanovqa amerikalyq boksshydan jeńisti julyp alýǵa sál-aq qalǵan edi. Berikke óte myqty qarsylas kezigipti, ol - óte jyldam, tehnikasy joǵary, jeńiske qushtar. Abdrahmanov Olimpiadada tuǵyrdan kórinetin sońǵy múmkindik týǵanyn bildi. Múmkin senimdilik azdaý boldy ma dep te oilaimyn. Jaqypovqa keletin bolsaq, boksshymyz jas emes, jeńilis sebebi de sonda jatqan shyǵar. Bul salmaqta negizinen jastar óner kórsetedi. Hasanboi Dýsmatov Birjannyń janynda jyldam ári sergek kórindi».
- Abylaihan Júsipovtiń jeńilisine qatysty pikirińiz qandai?
- Ol áli jas boksshy, al Olimpiadada óner kórsetý tipten qiyn. Bul Oiyndar - boksshymyz úshin úlken mektep bolmaq. Oǵan osy alǵan qarqynmen alǵa jylji berý kerek. Jalpy Makkormakqa qarsy jekpe-jekte Júsipov jaman judyryqtasqan joq. Eger kúsh áleýetin arttyryp, tyńǵylyqty daiyndyqpen keletin bolsa, kelesi Olimpiadada medalǵa talasa alady.
- Qalǵan boksshylarymyz qazaqstandyqtardy qýantyp, kelesi kezeńge ótti.
- Maǵan jartylai finalǵa ótken Vasilii Levit unady. Onyń «altyn» alatyn barlyq múmkindikteri bar dep sanaimyn. Rioda eki jekpe-jek ótkizgen Levittiń ónerine qarap, onyń qanshalyqty jaqsy formada ekenin baiqaý qiyn emes. Kelesi kezdesýde kýbalyq boksshyǵa qarsy turý aýyr bolatyny anyq, biraq Levit burynǵy ketken esesin qaitarýdy taǵatsyzdana kútip otyrǵan da bolar jáne finalǵa shyǵý úshin barlyǵyn isteidi. Daniiar Eleýsinov, Ádilbek Niiazymbetov, Jánibek Álimhanuly, Ivan Dychko - medal alatyn jaqsy múmkindikterge ie boksshylar. Bul jigitter altyn medal úshin qoldan keler barlyq kúshterin salady.
- Olimpiada finalyna bergisiz Dychko men Medjidov arasyndaǵy jekpe-jekke qatysty ne aita alasyz?
- Ekeýiniń úsh jyl burynǵy kezdesýin barlyǵy biletin shyǵar. Alaida Ivannyń sol kezden beri tájiribesi tolysty, ózine degen senimi artty. Ese qaitarýǵa asyǵyp júrgen Dychko óz isin jaqsy atqaryp shyǵatynyna senimdimin. Osy jekpe-jekte Dychko jeńedi dep boljap otyrmyn.
