Qysqy ýniversiada alaý estafetasynyń Almatydaǵy kezeńine alaý kóterýshi retinde qatysatyn bokstan olimpiada chempiony Ermahan Ibraiymov alda kele jatqan jarystar ońtústik astanaǵa qandai yqpalyn jasaityndyǵy jóninde óz oilaryn bólisti.
- Aldaǵy Qysqy ýniversiadaǵa qatysty úmitim zor, - dedi Ermahan Ibraiymov. – Birinshi kezekte, osy oiyndar qalamyzǵa bai mura qaldyrmaq, jańadan salynǵan sporttyq obekter almatylyqtardyń igiligine qyzmet etetin bolady. «Almaty-Arena» muz keshenin mysalǵa alaiyq, ol qalanyń kórikti ornyna ainaldy, jas jubailar osynda kelip, sýretke túsip jatqanyn ózim kórdim. Olimpiada oiyndaryn nemese Ýniversiadany ótkizgen qalanyń damýynda úlken serpin baiqalatyny belgili. Ýniversiada kezinde Almatyǵa shetelden kóptegen sportshylar, jankúierler men týrister kelmek, qalamyz kórkeiip, jaqsy jaqqa qarai ózgeredi. Ekinshiden, Ýniversiada jetekshi qazaqstandyq sportshylar úshin óz paidasyn tigizedi, óitkeni ol 2018 jylǵy Qysqy olimpiada oiyndaryna daiyndyqtyń kelesi bir kezeńine ainalmaq. Almatyda Ýniversiadany ótkizgen soń, atletterimizdiń qaisysy Olimpiadada medalderi úshin kúresetinin biletin bolamyz. Úshinshiden, Ýniversiada sekildi aýqymdy is-sharany ótkizý arqasynda qalamyz qandai baǵytta damý qajettigin anyqtai alady.
- Qysqy ýniversiada kezinde qandai jarystarǵa baratynyńyzdy sheship qoidyńyz ba?
- Erler arasyndaǵy hokkei jarysyn kórgim keledi, mánerlep syrǵanaýshy Denis Tenniń jankúierleri qatarynan tabylamyn. Sondai-aq, tramplinnen sekirý jáne biatlon jarystaryna barýdy josparlap otyrmyn.
- Sportpen ainalysyp júrgende, Jazǵy ýniversiadalarǵa qatysyp kórdińiz be?
- Ókinishke qarai, ondai qurmet baǵyma buiyrmady. Men iri jarystardyń barlyǵyna qatystym, álem jáne Aziia chempionattarynda, Aziia jáne Olimpiada oiyndarynda oiyn kórsettim, alaida Ýniversiada meniń tizimimde bolǵan joq. Ne sebepti olai bolǵany túsinikti: men oiyn kórsetip júrgen kezimde, boks Jazǵy ýniversiadanyń jarys baǵdarlamasynda engizilmegen bolatyn, ony jaqynda ǵana qosty.
Esterińizge salyp ótsek, Ýniversiadanyń alaý estafetasyna belgili qazaqstandyq sportshylar, óner qairatkerleri men stýdentter qatysady.
