Foto: Tengrinews.kz
Bloger Erbolat Janabylovqa qatysty kelesi sot otyrysy 15 qyrkúiekke taǵaiyndaldy, dep habarlaidy Astana qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń baspasóz qyzmeti.
Bloger Erbolat Janabylovqa ("Elior" jeke kásipkerligi) qatysty is lotereia operatory emes tulǵa arqyly lotereilik qyzmetpen ainalysý faktisi (ÁQBtK 445-1 babynyń 6-bóligi) boiynsha qaralyp jatyr.
21 tamyzda Týrizm jáne sport ministrliginiń qumar oiyndar men lotereiany retteý komitetine azamat S.-nyń ótinishi men Qarjylyq monitoring agenttiginiń zańsyz lotereia ótkizý faktisi boiynsha hattamasy kelip túsken. Atalǵan lotereia Instagram áleýmettik jelisindegi "zhanabylov_e" akkaýnty arqyly ótkizilgen.
Is materialdaryna sáikes, Janabylov atalǵan paraqshada júieli túrde aqshalai qarajatty, 10 avtokólikti jáne ózge de baǵaly syilyqtardy oinatqan. Oiynǵa qatysý sharttarynyń biri – Janabylovtyń jubaiy basqaratyn "Zhana Business" JShS-niń "oqytý kýrstaryna" 30 myń teńge tóleý bolǵan. Jeńimpazdar "sáttilik barabany" qurylǵysy arqyly kezdeisoq tańdaý ádisimen anyqtalǵan, bul óz kezeginde lotereia qyzmetiniń belgilerin kórsetedi.
"Isti qaraý barysynda Komitet Janabylovty oqytý kýrstaryn satý túrindegi lotereiany zańsyz uiymdastyryp, ótkizgeni úshin QR lotereia týraly zańnamasyn buzdy dep tanýdy jáne ony ákimshilik jaýapkershilikke tartýdy surap, sotqa ótinish bildirdi. Janabylovtyń ókili jeke qaýly shyǵarýdy jáne ákimshilik isti toqtatýdy surady", – delingen habarlamada.
Kelesi sot otyrysy 15 qyrkúiekke taǵaiyndaldy.
