QR Ishki ister ministrligi tótenshe jaǵdai rejiminde jumys istep jatqan qyzmetkerlerin yntalandyrýǵa 653 mln teńge bóldi, dep habarlaidy "Ult aqparat".
«Koronavirýs infektsiiasynyń taralýyna bailanysty elimizdiń ishki ister organdarynyń jeke quramy erekshe jumys rejimine aýystyryldy. Politseiler, áskeri qyzmetshiler, azamattyq qorǵaý qyzmetkerleri quqyqtyq tártipti, asa mańyzdy obektiler men halyqtyń tynys-tirshiligin, kóliktiń jumys isteýin qamtamasyz etetin nysandardy qorǵaý jáne karantindik sharalar júrgizý boiynsha táýlik boiy qyzmet atqarady», - delingen QR IIM baspasóz qyzmetiniń málimetinde.
Osyǵan rette Ishki ister ministri Erlan Turǵymbaev tótenshe jaǵdai kezinde jumys istep jatqan politseilerdi kótermeleý týraly sheshim qabyldaǵan.
«Biz qyzmetkerlerimizdiń qaisarlyǵy men jaýapkershiligin kórip otyrmyz. Olar barlyq qazaqstandyqtar úshin osy kúrdeli kezeńde kúndiz-túni óziniń qyzmettik boryshyn jáne el basshylyǵy qoiǵan mindetterdi oryndap keledi. Tótenshe jaǵdai rejimin qamtamasyz etýge qatysatyn qyzmetkerler materialdyq turǵyda yntalandyrylady. Bul maqsatqa Ishki ister ministrligi 653 mln teńge bóldi», - dep atap ótti IIM basshysy.
Aita keteiik, tótenshe jaǵdai kezinde elimizde 8 myńnan astam politsei qoǵamdyq tártipti kúzetýde.
