Aqtóbege jumys saparymen Ishki ister ministri Erlan Turǵymbaev keldi. Bul týraly IIM baspasóz qyzmetin habarlady.
Ishki ister ministri Erlan Turǵymbaev Aqtóbe oblystyq politsiia departamentiniń jeke quramymen kezdesti. Kezdesýde ol qazirgidei kúrdeli jaǵdaida politsiianyń jaýapkershiligi aitarlyqtai artyp, ýchaskelik inspektorlardyń jumysy aiyryqsha mánge ie bolǵanyn atap ótti.
Vedomstvo basshysy qoǵamdyq tártipti qamtamasyz etý, quqyq buzýshylyqtyń aldyn alý, qylmysqa qarsy kúres, uiymdasqan qylmys pen esirtki qylmysyna, urlyqqa, onyń ishinde mal urlyǵyna qarsy atqarylyp jatqan jumystarmen tanysyp, qyzmetkerlerdiń aldyna birqatar naqty mindetter qoidy.
«Jalpy Ishki ister ministrligine eldegi qoǵamdyq tártip pen qaýipsizdikti saqtaý boiynsha úlken mindetter júkteledi. Ministrliktiń qazaqstandyq qaýipsiz qoǵam qurýǵa qosqan úlesi óte mańyzdy. Bizdiń barlyq jumysymyz elimizdegi tiisti quqyqtyq tártipti qamtamasyz etýge, qylmysqa qarsy kúreske, azamattardyń konstitýtsiialyq quqyqtary men bostandyqtaryn qorǵaýǵa baǵyttalýy tiis. Azamattardyń qaýipsizdigi barynsha qamtamasyz etilip, halyqtyń tynyshtyǵy saqtalýy óte mańyzdy», - dep atap ótti Erlan Turǵymbaev.
Ministr Aqtóbe qalasynyń ýchaskelik politsiia inspektorlarynyń jumysymen egjei-tegjeili tanysyp, ýchaskelik pýnktterdi aralap kórdi. Jergilikti politsiia qyzmetkerleri zamanaýi tehnologiialardyń múmkindigi týraly aityp berdi. Erlan Turǵymbaev oblys ákimi Ońdasyn Orazalinmen kezdesý barysynda quqyqtyq tártip pen azamattardyń qaýipsizdigin qamtamasyz etýde politsiiaǵa qoldaý kórsetken jergilikti atqarýshy organdar basshylaryna alǵysyn aitty. Memleket basshysynyń «Jurtqa jaqyn politsiia» qaǵidaty boiynsha jergilikti politsiia qyzmetine reforma júrgizýdi tapsyrǵanyn eskere otyryp, ministr men ákim ýchaskelik politsiiany materialdyq-tehnikalyq jaraqtandyrý jáne onyń ónimdi qyzmet atqarýyna jaǵdai jasaý máselelerin talqylady. Ýchaskelik inspektor naqty aýmaqta qylmystyń aldyn alý, halyqpen ózara bailanys jasaý jáne olardyń máselelerin jedel sheshý úshin tynbai eńbek etýi tiis. Óz kezeginde jergilikti atqarýshy organ olardy ýchaskelik beketqa qajetti ǵimarat bólý, salý isi toqtamaýy tiis.
Aita keteiik, Aqtóbe qalasynda 125 ýchaskelik politsiia inspektory men olardyń 14 kómekshisi jumys isteidi. Oblys ortalyǵynda 25 jáne aýdandarda 145 ýchaskelik politsiia pýnktiniń ǵimaraty bar.
