Búgin Qaraǵandy oblysynyń qylmystyq ister boiynsha mamandandyrylǵan aýdanaralyq sotynda qoryqshy Erlan Nurǵalievtiń ólimine qatysty sot isi boiynsha jaryssóz ótti, dep habarlaidy "Ult aqparat".
Memlekettik aiyptaýshy Qýanysh Jeksenbaev aiyptalýshylar Berik Ahmetov, Nurlan Shúkildikov jáne Qairat Aqshanovty ómir boiyna bas bostandyǵynan aiyryp, jazasyn erekshe qaýipsizdik koloniiasynda óteýin surady. Sondai-aq, prokýror sottan ár aiyptalýshydan 30 AEK-ke deiin óndirip alý jáne olarǵa bes jyl boiy ań aýlaýǵa tyiym salýdy surady.
Sonymen qatar Qýanysh Jeksenbaev Berden Bazarov, Batyrbek Qaiyrbekov, Jarashan Myrzabaev pen Aidos Ákimovti alty jylǵa sottaýdy ótindi.
Aita ketý kerek, buryn sotqa deiingi tergeý organdary olarǵa qatysty qylmystyq isti toqtatqan bolatyn. Alaida, Erlan Nurǵalievtiń ulynyń qorǵaýshysy Ǵalymjan Táýekelov bul sheshimmen kelispeitinin jetkizdi. Joǵaryda atalǵan tórt azamatqa qatysty qylmysty jasyrý jáne ol týraly habarlamaý baptary boiynsha tergeýdi qaita júrgizý týraly jeke qaýly shyǵarýdy surady.
Sondai-aq, advokattyń sózinshe, moraldyq shyǵyn somasy - 20 mln teńge.
«Biz materialdyq shyǵyndy 9 million 137 myń 600 teńge dep baǵalaimyz. Qaza tapqan adamnyń otbasy dál osyndai somany qonaq asyna, qyryq kún, jyldyq asyn ótkizýge jáne mazar salýǵa jumsady. Qaza tapqan otbasynyń moraldyq ótemaqysyn biz 20 million teńgege baǵalaimyz», - dedi Ǵalymjan Táýekelov.
Eske sala ketsek, ótken jyly 15 qańtarda Qaraǵandy oblysy Nura aýdanynyń aýmaǵynda kiik atqan brakonerler eki inspektordy jaralaǵan edi. Aýyr jaraqat alǵan Erlan Nurǵaliev 15 qańtarda Astananyń №1 aýrýhanasynda kóz jumdy. QR Ishki ister ministri Qalmuhanbet Qasymov jaraqat alǵan «Ohotzooprom» inspektoryn qutqarýǵa nelikten kóp ýaqyt ketkenin túsindirdi. Sondai-aq brakonerler qolynan qaza tapqan inspektordyń artynda tórt balasy qalǵan.
Al QR Ekologiia, geologiia jáne tabiǵi resýrstar ministri Maǵzum Myrzaǵaliev brakonerler qolynan mert bolǵan inspektordyń otbasyna kóńil aityp, onyń otbasyna barlyq qajetti kómek kórsetiletinin jetkizdi.
