Foto: Májilis baspasóz qyzmetinen
19 naýryz Qazaqstan Prezidenti Qasym-Jomart Toqaevtyń prezidenttik qyzmetin atqaryp kele jatqanyna 6 jyl toldy. Osyǵan bailanysty Parlamenttiń tómengi palatasyndaǵy búgingi Plenarlyq otyrys Q. K. Toqaevtyń saiasi reformalaryn iske asyrý – memlekettik qurylystyń jańa tarihi kezeńi týraly ótti, dep habarlaidy Ult.kz.
Májilis spikeri Erlan Qoshanov osy jolǵy otyrys Memleket basshysynyń Joldaýyn elimizdiń búgini men bolashaǵyna tigizer yqpaly turǵysynan durys ári jan-jaqty zerdelep, saralaý úshin, azamatarymyzdyń da eldegi reformalardy jete túsinip, qabyldaýyna septigin tigizý maqsatynda ótip otyrǵanyn aitty.
Parlament Májilisi spikeri Erlan Qoshanovtyń baiandamasy:
Osydan úsh jyl buryn, dál osy zalda, Memleket basshysy Qasym-Jomart Kemeluly Toqaev halyqqa tarihi Joldaýyn jariialady.
Ol ýaqyt álem úshin de, Qazaqstan úshin de almaǵaiyp, kúrdeli synaqtardyń kezeńi bolǵanyn bilesizder.
Pandemiia indeti dúrbeleń týǵyzdy.
Jahandyq jáne aimaqtyq qaqtyǵystar, sanktsiialyq soǵystar beleń aldy.
Bizdiń elge de ońai tigen joq.
Naýqanshyldyqtan, jasandylyqtan qajyǵan qoǵamnyń ózi ekiudai kóńil-kúide boldy.
Tipti, memlekettiń táýelsizdigi men tutastyǵyna qater tóngen sátterdi bastan ótkerdik.
Aldymyzda kúrdeli jol, kúrmeýli tańdaý turdy.
Sonyń bárine qaramai, syn saǵatta Prezidentimiz elmen birge bolyp, qiyndyqtardy abyroimen eńserdik.
Memleket basshysynyń úsh jyl burynǵy «Jańa Qazaqstan: jańarý men jańǵyrý joly» atty halyqqa Joldaýy syn-qaterlerge berilgen kesimdi ári naqty jaýap boldy.
Bul – eldiń eńsesin kótergen, rýhyn oiatqan, ultymyzdy uiystyrǵan Joldaý!
Shyn máninde, Jańa, Ádiletti Qazaqstan qol jetpes arman emes.
Ol – halqymyzdyń talap-tileginen, qoǵamnyń suranysynan týyndaǵan qajettilik, ómirdiń shyndyǵy.
Al, reformalar jai ǵana zańdy ózgertý emes, tutas memleket pen qoǵamnyń bolmys-bitimin jańartý, jańǵyrtý.
Álemde jetistikke jetýdiń ámbebap modeli joq.
Jalpyǵa ortaq printsipter ǵana bar.
Ol – ádildik, erkindik jáne damý.
Prezident qolǵa alǵan reformalardyń da túpki máni – osy.
Biz qazir múlde jańa, ózgerister dáýirinde ómir súrip jatyrmyz.
Sol tarihi úderisterdiń kýágeri ári qatysýshysy bola tura, onyń mańyzyn árdaiym tereń sezine bermeimiz.
Ony úirenshikti, kúndelikti jaǵdai siiaqty kóremiz.
Al, shyn máninde, kez kelgen tarihi, taǵdyrly oqiǵalarǵa óz ýaqytynda, laiyqty baǵa berilýi kerek.
Sondyqtan, Memleket basshysynyń Joldaýyn elimizdiń búgini men bolashaǵyna tigizer yqpaly turǵysynan durys ári jan-jaqty zerdelep, saralaý asa mańyzdy.
Ol azamatarymyzdyń da eldegi reformalardy jete túsinip, qabyldaýyna septigin tigizedi.
Búgingi Plenarlyq otyrys osy maqsatqa arnalyp otyr.
Memleket basshysynyń sol tarihi Joldaýynda aitylǵan ár sózi bárimizdiń jadymyzda.
Qasym-Jomart Kemeluly sol kezdegi qalyptasqan jaǵdai men el taǵdyryna qatysty oi-paiymdaryn búkpesiz, egjei-tegjeili jetkizdi.
Memleket basshysy men qoǵamnyń arasynda buryn-sońdy bolmaǵan ashyq, riiasyz dialog halyqtyń bilikke degen úmitin oiatty, senimin nyǵaitty.
«Halyqpen birge» qaǵidasy Prezident saiasatynyń negizgi ózegine ainaldy.
Reformalardyń qoǵamnyń qoldaýyna ie bolýynyń basty kepili de – osy.
El tarihynda tuńǵysh ret Konstitýtsiianyń úshten birine demokratiialyq printsipterge sai túbegeili ózgerister endi.
Úsh jyldyń ishinde bilik tarmaqtarynyń bári tolyqtai jańaryp-jańǵyrdy.
Konstitýtsiialyq referendým, Prezident jáne Parlament sailaýy ótti.
Jalpy, bul ózgerister prezidenttik institýttan bastaldy.
Sýperprezidenttik basqarý júiesi shekteldi.
Prezident endi eshqandai partiiaǵa múshe bolmaidy.
Jaqyn týystarynyń joǵary laýazymdy qyzmet atqarýyna tyiym salyndy.
Memleket basshysynyń jeke bastamasymen Konstitýtsiiaǵa bir rettik, jeti jyldyq merzim qaǵidasy engizildi.
Bul bolashaqta biliktiń bir qolǵa shoǵyrlanýyna jol bermeitin zańdy tetik boldy.
Aita ketý kerek, mundai tájiribe álemniń sanaýly memleketterinde ǵana bar.
Osynyń bári el múddesi, memleket bolashaǵy úshin jasalǵan batyl da tabandy qadamdar ekeni sózsiz.
Sonymen qatar, túrli deńgeidegi ókildi organdardyń quramy qaita jasaqtaldy.
Aýdan, aýyl ákimderi sailanbaly júiege kóshti.
Eldegi saiasi uiymdardyń, azamattardyń belsendiligi arta tústi.
Bul qoǵamdy jumyldyryp qana qoimai, eseitti dese de bolady.
Kóz aldymyzda halyqtyń oi-sanasy ózgerdi.
Qundylyqtary jańardy.
Basqasha aitsaq, ondaǵan jyldar boiy nátijesin berip kelgen júie óz jumysyn toqtatady degen sóz.
Otyz jyl boiy Qazaqstanda sýperprezidenttik basqarý formasy qoldanyldy.
Alaida, ýaqyt óte kele, uzaq jyldar boiy jumys istegen model úlken saiasi daǵdarysqa alyp keldi.
Buǵan negizinen memleketimizge bir ǵana adam ústemdik etip, eldiń bar bailyǵyn sanaýly adam ielenýi sebep boldy.
Bul jait qoǵamnyń ashý-yzasyn týǵyzdy jáne eldiń damýyn tejedi.
Sondyqtan úsh jyl buryn saiasi júieni jańǵyrtý protsesin bastaýdyń mańyzy zor edi.
Búkil biliktiń bir qolda shoǵyrlanýyna múmkindik beretin júieden bas tartý qajet boldy.
Álemde bolyp jatqan jaǵdailar kóptegen elde joǵarǵy bilikti basqa saiasi institýttarǵa berý jáne tabystaý áli kúnge deiin túrli daý men pikirtalasqa ulasatynyn kórsetip otyr.
Bizdiń elimizde Prezident, kerisinshe, óziniń jeke bastamasy boiynsha ókilettikterdiń bir bóligin qaita bólip, bir rettik jeti jyldyq merzimdi engizdi.
Osylaisha, sýperprezidenttik basqarý modeliniń dáýiri aiaqtaldy.
Iaǵni, elimizde burynǵy saiasi qurylym men eldi basqarýdyń qoldanysta bolǵan printsipteri túbegeili ózgerdi.
Bilik tarmaqtary arasynda ońtaily tepe-teńdik saqtalatyn, memlekettik-saiasi qurylymnyń múlde jańa modeli qalyptasty.
Endi Prezidenttiń janynda jańartylǵan, qajetti ókilettikteri bar jáne qoǵamnyń senimine ie bolǵan Parlament, Úkimet, Konstitýtsiialyq Sot jáne saiasi partiialar paida boldy.
Ár is-áreketten zań men tártipke degen qurmet kórinip turatyn áleýmettik memlekettiń aishyqty beinesi aiqandalyp keledi.
Osy sátten bastap Ádiletti Qazaqstan jai ǵana uran emes, naqty múmkindikke ainaldy.
Bul jaǵdaida zań shyǵarýshy organnyń ókilettikteri edáýir kúsheiip, fýnktsiialary keńeie tústi.
Osylaisha, jańa Parlamentke printsipshil, jańa kózqaras ustanatyn, zaman talabyna sai zań shyǵarýshylar qajet edi.
Reformalardy iske asyrýdyń bastapqy qadamy sailaý zańnamasyn yryqtandyrýdan bastaldy.
Ol partiialar men qoǵamdyq birlestikterden bastap barsha qarapaiym azamattarǵa deiin kúshti serpin berdi.
Elimizdiń saiasi ómirine barlyq adamnyń aralasýyna naqty ári teń múmkindikter paida boldy.
Bizdiń qoǵam úshin mańyzdy jańalyq – partiialyq tizimder men bir mandatty okrýgter boiynsha aralas sailaý júiesin engizý boldy.
Qoǵam eńsesin kóterip, bolashaqqa degen senimmen belsendi túrde jańa kóshbasshylar izdei bastady.
Máselen, tek elordanyń ózinde bir mandatty okrýgter boiynsha bir orynǵa alpysqa deiin adam úmitker boldy.
Básekeli jáne ádil sailaý qorytyndysy boiynsha elimizdiń túbegeili jańa ókildi organy quryldy.
Májiliske ótken alty partiia tájiribesine qaramastan, mandattarǵa ǵana emes, palatada basshylyq laýazymdarǵa ornalasý quqyǵyna ie boldy.
Bul – óz sailaýaldy tuǵyrnamalary men mindettemelerin iske asyrý úshin úlken múmkindik.
Sonymen qatar bir mandatty okrýgterde qatań básekelestikten ótken jańa depýtattar qatarǵa qosyldy.
Depýtattyq korpýs túbegeili jańardy.
Zań shyǵarý isine partiialar men syndarly oppozitsiialyq top ókilderi keldi.
Buǵan deiin Májilis tek partiialyq tizim boiynsha qalyptasyp, onyń basym bóligin júieli túrde burynǵy shaqyrylymnyń depýtattary quraityn.
Olardyń deni memlekettik qyzmettegi nemese memlekettik qyzmettiń ainalasyndaǵy adamdar bolatyn.
Jańa Májiliste depýtattyq korpýstyń 70%-y jańardy.
Onyń bári – ártúrli saladan kelgen jańa tulǵalar.
Zań shyǵarýshy organnyń jańarýy Memleket basshysynyń «Kúshti Prezident – yqpaldy Parlament – esep beretin Úkimet» formýlasyn is júzinde tolyqtyryp otyr.
Parlamenttik baqylaý uǵymynyń mán-mańyzy arta tústi.
Endi depýtattar halyqtyń erkin bildirip qana qoimai, atqarýshy bilik saiasatynyń halyq múddesine tolyq sáikes kelýin qadaǵalaidy.
Bul – bilik tarmaqtary arasyndaǵy klassikalyq tepe-teńdik júiesiniń aiqyn kórinisi.
Qazir sailaýda jeńiske jetken partiia Premer-Ministrdiń kandidatýrasyn usynady.
Prezidenttiń bul sheshimi Májilistiń ókilettigin aitarlyqtai kúsheitti.
Parlamentte zań shyǵarý úderisiniń sipaty túbegeili ózgerdi.
Bir ǵana mysal.
Buryn zań jobalarynyń kóbi Úkimetten túsetin.
Qazir depýttar bastamashy bolǵan zańdardyń sany artyp keledi.
Eń bastysy, olar – azamattardyń dál qazirgi suranysyna, talap-tilegine jaýap beretin zańdar.
Qoǵamdy alańdatqan barlyq ózekti másele Májilis qabyrǵasynda ashyq talqylanyp, sheshimin taba bastady.
Kóptegen kúrdeli túitkilder boiynsha mańyzdy zańnamalyq sheshimder ázirlendi.
Olardyń bári qandai qyzý pikirtalastardan keiin qabyldanyp jatqanyn kórip otyrsyzdar.
Qumar oiynǵa táýeldilik, esirtki men veip, turmystaǵy zorlyq-zombylyqpen kúres jáne halyqtyń qaryz júktemesin jeńildetý boiynsha asa mańyzdy zańdar qabyldandy.
Bul qoǵamnyń qoldaýyna ie boldy.
Ziiandy ári qaýipti óndiriste jumys isteitin myńdaǵan jumysshynyń talap-tilegi oryndalyp, zańnamen retteldi.
Osy jerde, sońǵy jyldary qabyldanǵan barlyq zańǵa Prezidenttiń «ádilettilik ideiasy» arqaý bolǵanyn atap ótken jón.
Jerdiń astyndaǵy jáne ústindegi qazyna-bailyq halyqtyń menshigi degen normany Konstitýtsiiaǵa shegelep jazdyq.
Qazir bul printsip «Ulttyq qor – balalarǵa» zańy arqyly júzege asyrylyp jatyr.
Budan bólek, jańadan ashylǵan iri ken oryndarynyń 50 paiyzdan kóbi memleketke tiesili bolady.
Jer máselesi de depýtattardyń únemi nazarynda.
Tikelei Prezidenttiń pármenimen, jurtshylyqtyń atsalysýymen zańsyz alynǵan aktivterdi qaitarý týraly zań qabyldandy.
Sonyń nátijesinde eki trillion teńgege jýyq aktiv elge qaitaryldy.
Osynyń bári – Prezident reformalarynyń jemisi.
Tarihi ádilettilikti qalpyna keltirýge baǵyttalǵan batyl qadamdar.
Birlesken kúsh-jigeriniń arqasynda depýtattar Memleket basshysy kótergen kóptegen áleýmettik mańyzdy máseleni sheshýge qol jetkizip jatyr.
Aitalyq, muǵalimderdiń, dárigerlerdiń jalaqysy, stýdentterdiń stipendiiasy ósýde.
Daryndy balalarǵa, halyqaralyq olimpiadalar men ǵylymi konkýrstarǵa qatysýshylarǵa tólemder zańnamalyq turǵydan qamtamasyz etilgen.
El tarihynda alǵash ret jalpy densaýlyq saqtaý shyǵyndary ishki jalpy ónimniń 4 protsentine jetti.
Dárigerlerdi aýylda jumys isteýge yntalandyrý júrip jatyr.
Olar toǵyz million teńge kóleminde kóterme járdemaqy alady.
Onkoskriningterdi tegin meditsinalyq kómekke qosý úlken jetistik boldy, ol úsh jarym million adamdy qamtidy.
Bul tizimdi jalǵastyra berýge bolady.
Prezident reformalarynyń taǵy bir jeńisi –halyqty mazalaityn máseleler kóshede emes, Parlament qabyrǵasynda talqylana bastady.
Biz mazmundy, konstrýktivti talqylaý mádenietin qalyptastyryp jatyrmyz.
Tipti, Qańtar oqiǵasy boiynsha eki ret arnaiy parlamenttik tyńdaý ótkizdik.
Ashyq talqylaý barysynda tergeý amaldarynyń málimetteri búkpesiz jariialandy.
Oǵan Bas prokýratýra, quqyq qorǵaý organdary, quqyq qorǵaýshylar jáne sol kúnderi aýyr shyǵynǵa ushyraǵan kásipkerler shaqyryldy.
Eldiń kókeiindegi kóptegen saýaldarǵa jaýap berildi.
Sondai-aq, Májilis janynan qurylǵan Qoǵamdyq palatanyń jumysyn da erekshe atap óter edim.
Qazir Qoǵamdyq palata úilestirýshi alańǵa, negizgi zańnamalyq bastamalardy táýelsiz, kásibi saraptaý ortalyǵyna ainaldy.
Osylaisha, biz qoǵammen dialogtyń jańa formatyna kóshtik.
Bul da Memleket basshysynyń Ádiletti Qazaqstan qurý ideiasymen tolyq úndesip jatyr.
Jańartylǵan Parlamentpen qatar basqa da mańyzdy memlekettik institýttar bar.
Konstitýtsiialyq sottyń qurylýy sot tóreligi men azamattar quqyqtaryn qorǵaýda jańasha qýatty quralǵa ainaldy.
Bul – quqyqtyq memleketti nyǵaitý men ádilettilikti qamtamasyz etý jolyndaǵy mańyzdy qadam.
Atalǵan institýt jańa quqyqtyq arhitektýrada mańyzdy oryn alady.
Konstitýtsiialyq sotqa júginetinderdiń deni, árine, qarapaiym halyq, olardan toǵyz myńnan astam ótinish túsken.
Azamattar bul institýtty «álsizderdiń qorǵany jáne shyndyqtyń jarshysy» dep qabyldaidy.
Búgingi tańda Konstitýtsiialyq sot quqyqtyq daýlardyń tóreshisi retinde ǵana emes, sonymen birge Memleket basshysynyń reformalaryn demokratiialyq baqylaý men qorǵaýdyń mańyzdy elementi bolyp otyr.
Parij qaǵidattaryna sáikes jumys isteitin damyǵan Eýropa elderinde adam quqyqtary jónindegi ýákil institýtyna konstitýtsiialyq mártebe berildi.
Sonymen qatar Memleket basshysynyń atynan azamattardyń quqyqtary men múddelerin qorǵaý isine múgedektigi bar adamdar men kásipkerlerdi qorǵaý jónindegi ýákilder qosyldy.
Balalar ombýdsmeniniń jumysy birshama jańartyldy.
Ýaqyttyń ózi kórsetkendei, Prezidenttiń ombýdsmen institýtyn tikelei qoldaýy halyqty quqyqtyq turǵydan qorǵaýdy sapaly jańa deńgeige kóterdi.
Prezident jariia etken zań men tártip ústemdigi ádeletti memlekettiń ajyramas bóligi retinde qoǵamda syndarly ahýal qalyptastyrýda.
Al zań men tártip ideologiiasy adamdardyń sanasyna bekem ornyǵyp, qazaqstandyqtardyń ómir saltyna ainalyp keledi.
Jergilikti atqarýshy bilik júiesinde de aýqymdy ózgerister jasaldy.
Azamattardyń memleketti basqarý isine tikelei aralasýy jaiy uzaq jyldar boiy qoǵam tarapynan kóterilip kelgen edi.
Konstitýtsiialyq reforma bul máselege núkte qoidy.
Egemendik tarihynda tuńǵysh ret elimizde aýdan men aýyl ákimderiniń tikelei sailaýy ótti.
Bul qadam memlekettik apparattyń jumysyna jan bitirdi.
Qarapaiym azamattar úshin sailanbaly qyzmetterge jol ashyldy.
Munyń ózi jergilikti jerdegi saiasi ómirdi jandandyryp, azamattardyń sheshim qabyldaý isine belsene aralasýyna keń múmkindik berdi.
Qazirgi ýaqytta turǵyndardyń sailanǵan ákimderge degen senimi anaǵurlym artty.
Jergilikti bilik pen qoǵam máselelerdi birlesip sheshýge qol jetkizdi.
Búgingi tańda elektoraldyq naýqandar elimizdiń túkpir-túkpirinde únemi júieli túrde ótkizilip jatyr.
Sailaý qalypty, úirenshikti jaǵdaiǵa ainaldy.
Eń bastysy, ár túrli salanyń ókilderi ákim bolyp sailanýda.
Olardyń bári – múlde jańa tulǵalar, Jańa Qazaqstannyń jańa basqarýshy elitasy.
Endigi kezekte sailanǵan ákimderdiń quzireti men ókilettigin, qarjylyq múmkindikterin keńeitý kerek.
Aldymyzda olardy zańmen, biýdjetpen jumys isteýge beiimdeý, oqytý mindeti tur.
Qazir «AMANAT» partiiasy Úkimetpen birge osy máselelermen ainalysyp jatyr.
Júrgizilip jatqan reformalar elimizdi halyqaralyq qatynastar júiesinde de jańa deńgeige shyǵardy.
Bilikti de tájiribeli diplomat sanalatyn Memleket basshysynyń basqarýymen Qazaqstan jahandyq saiasi protsesterdiń mańyzdy qatysýshysy bolyp otyr.
Elimiz birden birneshe bedeldi halyqaralyq uiymda laiyqty tóraǵalyq etip, ózin álemdik dialog ortalyǵy retinde kórsetti.
Halyqaralyq sarapshylar Qazaqstandy «óńirdegi adal kelissóz júrgizýshi» dep atai bastady.
Qazaqstannyń úlken jetistigi – bul BUU Bas Assambleiasynyń Almaty qalasyn Ortalyq Aziia men Aýǵanstan úshin Ornyqty Damý Maqsattary boiynsha Birikken Ulttar Uiymynyń óńirlik ortalyǵy retinde bekitýi.
Bul halyqaralyq arenadaǵy jaýapty áreketimen jáne ýaqyt talabyna syndarly kózqarasymen erekshelenetin elimizdiń orta derjava retindegi rólin bekemdei túsedi.
Eýropadaǵy asa bedeldi nemis ǵylymi-taldaý ortalyǵy – «Ǵylym jáne saiasat qory» (SWP) elimizdi orta derjavalar tizimine engizip, Qazaqstandy óńirdegi negizgi oiynshy dep kórsetkenin atap ótken jón.
Munyń bári – Memleket basshysynyń halyqaralyq arenadaǵy maqsatty kúsh-jigeriniń mańyzdy nátijesi.
Endi bizdiń aldymyzda óz ulttyq múddeleri bar, jetilgen memleket retindegi missiiamyzdy, órkeniettik kodymyzdy, mádenietimiz ben tarihymyzdyń mańyzyn álemdik qoǵamdastyqqa jetkizý mindeti tur.
Prezident jýyrda ótken Ulttyq quryltaidyń otyrysynda bizdiń aldymyzǵa dál osyndai mindet qoidy.
Búginde Ulttyq Quryltai jai ǵana forým emes, yqpaldy qoǵamdyq-saiasi institýtqa ainaldy.
Ol – alýan pikirlerdiń alańy, el taǵdyryna bei-jai qaramaityn azamattardyń bas qosatyn ortasy.
Bastapqyda munda mádeni-gýmanitarlyq máseleler kóptep talqylanatyn.
Al qazir saiasi, ekonomikalyq damý men infraqurylymdyq ózgeristerden bastap, eldi tolǵandyryp otyrǵan barlyq jaittarǵa erekshe mán berilýde.
Ulttyq quryltaidyń ár otyrysynda Memleket basshysy el damýynyń mańyzdy kezeńderin qorytyndylap, aldaǵy mindetterdi aiqyndaýdy igi dástúrge ainaldyrdy.
Prezidenttiń kóteretin máseleleri – tek memlekettik deńgeidegi strategiialyq josparlar ǵana emes, ár azamattyń, ár otbasynyń ómirine tikelei áser etetin naqty sharalar.
Sondyqtan da halyq bul jiyndy erekshe yqylaspen kútetini beker emes.
Osy joly da Prezident asa mańyzdy, ótkir máselelerge toqtalyp, maqsat-mindetterdi aiqyndap berdi.
Máselen, Astana – Arqalyq – Torǵai – Yrǵyz kúre jolyn salýdy tapsyrdy.
Oǵan qosa, Arqalyqtaǵy áýejai qalpyna keltirilip, jańa aerovokzaldyń qurylysy bastalady.
Jurtshylyq bul jańalyqtardy erekshe yqylaspen qabyldap jatqanyn kórip otyrmyz.
Osy otyrystyń aldynda ǵana maǵan depýtat Berik Beisenǵaliev kelip ketti.
Oǵan Torǵai, Arqalyq óńiriniń myńdaǵan turǵyny habarlasyp, Memleket basshysyna rizashylyǵyn jetikzýdi surap jatyr.
Budan bólek, quryltaida tsifrlandyrý men jasandy intellekt, kólik tranziti, atom energetikasy, agroónerkásiptik sektorǵa basa mán berildi.
Eń bastysy, Memleket basshysy adam kapitaly ornyqty damýdyń negizgi faktory bolyp qala beretinin qadap aitty.
Sonyń ishinde, bizge júktelgen sharýalar da az emes.
Olardyń qatarynda salyq reformasy, destrýktivti dini aǵymdarmen kúres, sondai-aq depýtattardyń bastamasymen ázirlengen shekaralyq aimaqtardy damytý týraly zań jobasy bar.
Bul baǵyttar eldiń damýy men qaýipsizdigin qamtamasyz etý úshin sheshýshi ról atqarady.
Bir sózben aitqanda, Quryltaida Memleket basshysy jalpyulttyq is-qimyl josparyn aiqyndady.
Bul – uly murattarǵa bastaityn, halyqqa senim men rýh beretin buljymas baǵdar.
Al, tarihta ekinshi múmkindik degen bolmaidy.
Halyq, ult retinde sony túsinýimiz kerek.
Ótkennen sabaq alyp, saraptap, bolashaqqa senimmen qadam basý – naǵyz jasampazdyqtyń belgisi.
Jarqyn bolashaq degenimiz – taǵdyrdyń jái ǵana syiy emes.
Bizdiń adal eńbegimizdiń, tókken terimizdiń óteýi bolatynyn jadymyzdan shyǵarmaiyq.
Bul jolda ult bolyp, jurt bolyp jumylyp, birge jumys isteýimiz kerek dep oilaimyn.
Osy zalda qanshama elge belgili azamattar, depýtattar otyr.
Qazir birazyńyz óz oilaryńyzben bólisesizder.
Sonyń bárin qorytyp, búgin elimizdiń barlyq progressivti qoǵamdyq-saiasi kúshterin Memleket basshysynyń tóńireginde toptasýǵa jáne Ádiletti Qazaqstan qurý qaǵidattaryna negizdelgen rezoliýtsiia (qarar) qabyldaýdy usynamyn!
Aldymyzda úlken mereke kele jatyr.
Ulystyń uly kúni, jyl basy, kóktem merekesi.
Bereke-birliktiń, molshylyq pen meiirimniń belgisi.
Bizdiń osyndai irgeli isterimizdiń de Áz Naýryzdan bastaý alyp jatqany beker emes dep oilaimyn.
Búgingi jumysymyzǵa sáttilik tileimin!
