"Qazaqstan" RTRK" AQ Basqarma tóraǵasy Erlan Qarin óziniń feisbýk jelisindegi paraqshasynda Ulttyq arnanyń 2017 jylǵy jumys barysy týraly málimdeme jasady, dep habarlaidy "Ult aqparat". Ol óz jazbasynda naqty sandar keltire otyryp ótken jyldyń qorytyndy kórsketkishterine toqtaldy.
"2017 jyl «Qazaqstan» telearnasy úshin ońai bola qoiǵan joq, sebebi, jalpy telenaryqta telekórsetilim deńgeii tómendeýde, biraq soǵan qaramastan biz jyldy jaqsy kórsetkishtermen qorytyndyladyq.
"Barlyq 6+" aýditoriiasynyń esepteýleri boiynsha, telearnanyń jyldyq ortasha úlesi 7,2% paiyzdy qurap, otandyq telenaryqta altynshy orynǵa jaiǵasty. Sońǵy jyldary kórermenge tanymal bolyp kelgen "Kelin" telehikaiasynyń efirde toqtatylýy telearnanyń aýditorlyq kórsetkishteriniń tómendeýine ákelip soǵady degen boljam joqqa shyqty. Sebebi, telearna jobalarynyń turaqty kórsetkishteri men jańadan shyqqan ár túrli janrdaǵy telejobalar jáne úzdik sheteldik teletýyndylar medianaryqtaǵy telearnanyń aýditoriiasyn tómendetýge jol bermedi. Sońǵy 4-5 jylda kórsetilgen bul telehikaia aýditorlyq kórsetkishterdiń 25-40 % úlesin qalyptastyrýdy qamtamasyz etip kelgen. Degenmen, utymdy josparlaý arqyly jańadan sapaly kontent usynyp, naqty taim-slotty ilgeriletý jumystaryn oidaǵydai júzege asyrǵandyqtan, jaqsy nátijelerge qol jetkize aldyq. Árine, basynda bul telehikaianyń efirden alynýy aýditorlyq kórsetkishterge kúrt áser etti. Naýryz aiynan bastap, iaǵni úndi telehikaiasy toqtatylǵan sátte telearnanyń reitingtik kórsetkishteri tómendei bastaǵan bolatyn. Sonymen qatar, dál sol kezde efirde ótip jatqan qysqy sporttyq oiyndaryna arnalǵan Búkilálemdik Ýniversiadanyń arnadaǵy transliatsiiasynyń aiaqtalýy da óz áserin tigizbei qoimady. Oǵan qosa úsh birdei arnanyń ortaq ólshemdik panelge enýi aýditorlyq kórsetkishterdiń bólinýine alyp keldi", - deidi Erlan Qarin.
Arna basshysy óz sózin:
"Al, biz óz tarapymyzdan kontentti jańartý jumystaryn júrgizýdi bastap ketken bolatynbyz. Sóitip, 2017 jyldyń kúzinde korporatsiiada rebrending jumystary sátti júzege asyryldy. Efirdegi vizýaldy ózgerister men sapaly kontent telearna kórermenderiniń ulǵaiýyna alyp keldi. Qazan aiynan bastap reiting kórsetkishteri turaqtalyp, qarasha-jeltoksan aiynda aitarlyqtai ósý úrdisi baiqaldy. Sondai-aq, efirdiń 79% ózimizdiń ishki ónim, bul basqa telearnalarmen salystyrǵanda eń joǵarǵy kórsetkish.
Sonymen qatar, telearna internettegi jáne áleýmettik jelilerdegi óz ornyn keńeite bastady. 2017 jyly YouTube videohostinginde engizilgen Ulttyq arna jobalarynyń qaralymy jalpy eseppen 77 mln-nan asty! Osy oraida «Qazsport» pen «balapan» telearnalary joǵarǵy kórsetkishterge ie bolyp, 2017 jyldyń 1 qańtarynan bastap kórsetkish reitingisi ólshenetin telearnalar qataryna engenin aita ketý kerek. Jyl qorytyndysy boiynsha, kabeldik telearnalardyń arasynda «balapan» telearnasy jalpy úlesi 3,1% paiyzben aldyńǵy qatardan oryn aldy. «Qazsport» telearnasynyń úlesi osy ýaqyt aralyǵynda 1,5% paiyzdy qurady. Al, korporatsiia quramyna kiretin telearnalardyń jalpy úlesi «Barlyq 6+» aýditoriiasy boiynsha 11,8% paiyzǵa jetti. Aýditoriianyń suranysy men talabyn eskere otyryp, efirdegi kontenttiń sapasyn arttyrý jumysy áli de jalǵasady", - dep túiindeidi.
