Áleýmettik jelide birqatar azamattar «beibit jiyndar týraly jańa zań qabyldandy emes pe, nelikten miting ótkizýge ruqsat berilmedi» degen sekildi pikir bildirýde. QR Prezidentiniń keńesshisi Erlan Qarin osyǵan orai Facebook-tegi paraqshasynda túsinikteme berdi, dep habarlaidy "Ult aqparat".
«Beibit jiyndardy uiymdastyrý jáne ótkizý tártibi» týraly jańa zańǵa mamyrdyń 25 kúni qol qoiylyp, óz kúshine dál búgin – maýsymnyń 6-synda enip jatyr. Onyń ústine, búgingi mitingige alǵash ret úndep shaqyrǵanda, bul zań sol kezde parlamentte áli talqylanyp jatqan bolatyn. Iaǵni, búgingi aktsiialardy uiymdastyrýshylar osy mitingini jańa zańǵa sáikes: bes kún buryn jergilikti bilik organdaryna aldyn ala habarlama jiberip, ótkizýge barlyq múmkindikteri boldy. Alaida, ókinishke qarai uiymdastyrýshylar qasaqana, jańa zańnyń búgin ǵana óz kúshine enetinin bile tura, mitingige shaqyryp, úndep jatty», dep jazdy Erlan Qarin.
Ekinshiden, QR Prezidentiniń keńesshisi, quqyqtyq normalardan basqa, tótenshe jaǵdai aiaqtalǵanymen, karantinniń birshama shekteýleri áli de saqtalýda ekenin atap ótti.
«Sanitarlyq qyzmet ókilderi kópshilik jinalatyn sharalardan basqa, tipti otbasylyq sharalardan bas tarta turýǵa qaita-qaita úndeýde. Osyndai jaǵdaida basqa azamattardyń densaýlyǵy men qaýipsizdigimen sanaspai, osyndai sharany ótkizý qai jaǵynan qarasańyz da durys bolmady» dep túsindirdi ol.
