Belgili ártis Erlan Bilál qarashańyraqta qalady. Ol akterler quramynda jumysyn jalǵastyra bermek. Bul týraly Almaty arnasynyń tilshilerine Muhtar Áýezov atyndaǵy Qazaq memlekettik akademiialyq drama teatrynyń jańa basshysy Ashat Maemirov aitty.
92 jyldyq tolassyz tarihy bar ákem teatrdyń jańa basshysy Ashat Maqsymuly Ázirbaijan Mámbetov sekildi teatrdyń mártebesin arttyrýdy qolǵa alǵandyǵyn alǵa tartady. «Altyn dáýirdiń» ainalyp kelýi úshin bilimi men biliktiligin barnysha sarp etetinin senimmen sóz qyldy. Sol úshin de halyqaralyq deńgeide qazaqtyń bar bolmysyn nasihattaityn qoiylymdardy kóptep shyǵarýǵa bel sheshe kirispek. Kópten beri sahnalanbai qalǵan spektaklderdi ártister quramy aldaǵy aida qaityp somdamaq niette.
«Shyńǵys Aitmatovtyń da «Ana Jer Ana» halyqtyq turǵydaǵy keń epikalyq tynysty úlken polotno bar. Osy polotnony qaitadan oraltý. Súiinbai babamyz týraly jazylǵan belgili dramatýrg memlekettik syilyqtyń iegeri Iran Ǵaiyptyń «Súiinbai» degen dramasy bar. Osy Súiinbaidy sahnalaý osy maýysymdaǵy bizdiń jumysymyz bolady», - dedi Muhtar Áýezov atyndaǵy Qazaq memlekettik akademiialyq drama teatrynyń direktory Ashat MAEMIROV.
«Alataýdan Saryarqaǵa sálem!» Osyndai uranmen qara shańyraq elordanyń 20 jyldyq toiyna arnaiy gastroldik saparmen barýdy da josparlap qoiǵan. «Teatr kóktemi» festivali de dástúrli túrde jalǵasyn tappaq. Osy joly halyq ártisi Ánýar Moldabaevtyń rýhyna baǵyshtaýdy qup kórgen. Qalibek Qýanyshbaev syndy sańlaq akterdyń biyl 125 jyldyǵy ekeni de esten shyqpaq emes, sol úshin de naýryz aiynda arnaiy «Abai» qoiylymy sahnalanbaqshy. Ashat Maqsymuly jańa qyzmetke taǵaiyndaý týraly buiryq shyqqannan keiin, uly tulǵalardyń basyna baryp ziiarat etkenin de jasyrmady. Al ónerde áriptes, ómirde dosy teatrdyń burynǵy basshysy Erlan Biláldiń qara shańyraqtyń sahnasyndaǵy jumysyn jalǵastra beretindigin basa aitty. Óitkeni, Erlan Bilálden basqa akter somdai almaityn onyń ózindik rólderi bar.
«Erlan osy teatrdaǵy negizgi repertýarlardy basty keiipkerlerdi somdaidy. Ol Muhtar Áýezovtyń «Abai jolyndaǵy» Abai, ony Erlannan basqa eshkim oinai almaidy. Ol Dýlat Isabekovtyń «Jaý júregindegi» Balýan Sholaq, Israil Saparbaevtyń «Syǵan serenadasyndaǵy» Shámshi beinesi, Ákim Tarazidyń «Aqyn perishte mahabbattaǵy» Muqaǵali beinesi. Erlannyń birinshi Alla Taǵala bergen talanty, artistizm, kásibi sheberligi, naǵyz ónerdegi tulǵa. Sondyqtan tulǵa teatrdan bólinip eshqaida ketpeidi», - dedi Muhtar Áýezov atyndaǵy Qazaq memlekettik akademiialyq drama teatrynyń direktory Ashat MAEMIROV.
Esterińizde bolsa, ákem teatrdy basqarǵan tulǵalardyń osymen ekinshi ret basy daýǵa qalyp otyr. Alǵashqysy Muhtar Áýezov atyndaǵy Qazaq memlekettik akademiialyq teatryn 1993-2001 jyldar aralyǵynda basqarǵan Tuńǵyshbai Jamanqulov ta ótken jyly «Feniks» kórkem filmine bólingen memleket qarjysyn jymqyrdy» dep aiyptalǵan edi. Al biyl Erlan Bilál 1 jarym million teńge para alǵanyn sotta tolyǵymen moiyndady. Osy tusta, Ashat Maqsymuly ákem teatrdyń tájin tot bastyrmaýǵa tyrysatyndyǵy tilge tiek etti. Al seksenniń seńgirine shyqqan, jarty ǵasyrdan astam ýaqyt ákem teatrda jumys istep kele jatqan halyq ártisi Sábit Orazbaev osyndai olqylyqtyń bul ordada bolǵany orynsyz ekenin qynjyla aitty.
«Qara shańyraqta ulylar bastap kele jatqan iz jańǵyryp jatýy tiis. Ol jastarmen tolyǵyp jatýy tiis, meniń uǵymym da solai. Sebebi bul Qazaqstannyń teatr óneriniń altyn táji, al altyndy tot baspaýy kerek, altyndy jarqyratyp biik ustaýymyz kerek. Sondyqtan bul turǵyda da meniń aldymdaǵy maqsat ta sol», - dedi Muhtar Áýezov atyndaǵy Qazaq memlekettik akademiialyq drama teatrynyń direktory Ashat MAEMIROV.
«Bizdiń teatrdyń tarihynda bundai bolmaǵan nárse. Tuńǵyshbai da osyndai abyroisyzdyqqa ushyrap qalyp, qansha halyq sóz aitty, qanshama renishter boldy, ol qanshama ret aqtaldy. Jalpy aqtalý degen ol beisharalyq. Mynaý ekinshi jaǵdai, minekei. Oiymyzda joq nárse, qolaisyz jaǵdai boldy», - dedi Qazaqstannyń halyq ártisi Sábit ORAZBAEV.
Ákem teatrdyń jańa basshysy Ashat Maqsymulynyń árbir qadamy kópshiliktiń nazarynda bolmaq. Tuńǵyshbai Jamanqulov pen Erlan Biláldiń kebin kise, jurttyń «jańylmaityn jaq, súrinbeitin tuiaq bolmaidy» dep aitýy endi ekitalai. Odan da, qara shańyraqty Mámbetovtai mártebege kóterý oiy iske assa, qazaq óneriniń biikke samǵaýyna sep bolmaq.
