«Júrekten júrekke» eriktiler tobynyń jetekshisi Álisher Sadyq VIII Azamattyq forýmynda eriktiler qyzmetin oqýshylarǵa oqytý bastamasyn kóterdi, dep habarlaidy QazAqparat tilshisi.
«Aqtóbede tórt jyldan beri qaiyrymdylyqty tý etken «Júrekten júrekke» atty eriktiler toby jumys istep tur. Men sonda jetekshimin. Atyraý qalasynan taraǵan topty Aqtóbede Ámina degen qyz jańǵyrtqysy kelip, osy bastama keiin qoldaý tapty. Bastapqy kezde 17 erikti qurǵan top músheleriniń sany búginde 100-ge jetti. Eriktiler tobynyń uiymdastyrýymen 130-dan astam qaiyrymdylyq sharasy, aitystar, qaiyrymdylyq keshteri, sporttyq sharalar, jármeńke jáne basqa da sharalar ótkizildi. Sonyń nátijesinde 7 mln teńgege jýyq qarjy tústi. Onyń bári muqtaj otbasylarǵa, syrqat jandardyń igiligine jumsaldy», - dedi bólisti Álisher Sadyq forýmnyń «Men senemin» azamattyq bastamalar konferentsiiasynda.
Onyń aitýynsha, tórt jyldyń ishinde aýyrtpalyqtar men ózindik qiyndyqtar bolǵan, dese de ol máseleler sheshiledi.
«Elimizde aityp kelmeitin tótenshe jaǵdai kezinde eriktiler kóbinese jumyldyrylmaidy. Olardyń sol apattyq jaǵdaiǵa kiretin ortaq tólqujaty bolsa degen usynysym bar. Frantsiiada halyqtyń 19 paiyzy keminde bir ret erikti jumysymen ainalysady. Germaniia halqynyń 34 paiyzy aiyna 15 saǵatyn osy volonterlyq jumysqa arnaidy. Irlandiia turǵyndarynyń 38 paiyzy, AQSh halqynyń 27 paiyzy, Resei turǵyndarynyń 8 paiyzy volonterlyqpen ainalysady. Al bizde bul sala dami qoiǵan joq», - deidi ol.
Álisher Sadyq eriktilik qyzmetti mektepte oqytý qajet ekenin atap ótti.
«Oqýshyǵa bilimmen qatar, qoǵamǵa kómek uǵymyn da túsindirý qajet. Shetelde osyndai jumystar júrgiziledi. Eger mektep qabyrǵasynan sol aýmaqtaǵy kóshelerdiń tazalyǵyn qamtamasyz etý, alǵashqy kómek kórsetý, múmkindigi shekteýli azamattarmen qalai jumys isteý kerek - osynyń bárin úiretsek, bolashaqta ózimiz qinalmaimyz. Múmkindik bolsa, aptasyna bir saǵattyq sabaq retinde engizýge bolady. Ol sabaqty belsendi erikti ótkizse degen usynysym bar. Osy qoǵamdyq sharalarmen, qaiyrymdylyqpen ainalysqan oqýshy bolashaqta elde bolyp jatqan áleýmettik máselelerdi kórip, ony sheshý joldaryn izdeidi», - dep usyndy ol.
Sondai-aq ol eriktilerdiń tólqujatyn jasaýdy, olardyń ústinen qaraityn respýblikalyq shtab qurý bastamasyn kóterip otyr.
Eske sala ketsek, dál qazir Astanada «Azamattyq qoǵam jáne memleket: Dialog. Seriktestik. Senim» taqyrybyndaǵy VIII azamattyq forým ótip jatyr. Elbasynyń qatysýymen ótetin aýqymdy shara eki kúnge sozylady. 35 taqyryptyq sessiiaǵa azamattyq sektor, memlekettik organdar, biznes-qurylymdar, halyqaralyq uiymdar, saraptamalyq qaýymdastyqtan 850 delegat jáne 150 spiker qatysýda. Sessiialar seminarlar, sheberlik synyptary, dóńgelek ústelder, pikirtalas alańdary, ministrlikter men vedomstvolar basshylarymen salalyq kezdesýler formatynda ótkiziledi.
