2009-2019 jyldarda óz jumysshylaryna biliktilik kýrsyn oqýdy usynǵan iri firmalardyń úlesi 51%-dan 42%-ǵa deiin tómendegen, dep habarlaidy QazAqparat.
Eńbek resýrstaryn damytý ortalyǵynyń Strategiia jáne jobalyq basqarý departamentiniń direktory Aleksandra Molchanovskaia BAQ ókilderine «Qazaqstannyń eńbek naryǵy: jańa jaǵdaidaǵy damý» atty tuńǵysh ulttyq baiandama tanystyra otyryp osyndai derekter keltirdi.
«Qazaqstanda adam kapitaly ulttyq jiyntyq bailyqtyń 42%-yn ǵana quraidy. Tabysy joǵary elderde bul kórsetkish – 70%. Elde jyl saiyn jumyspen qamtylǵandardyń ortasha eseppen 5%-y ǵana kəsibi biliktiligin arttyrady. 2009-2019 jyldarda óz jumysshylaryna oqý usynǵan iri firmalardyń úlesi 51%-dan 42%-ǵa deiin tómendegen», - dedi baiandamashy.
Onyń sózine qaraǵanda eresek qazaqstandyqtardyń biliktiligin arttyrýyna enjarlyq pen qarjylyq múmkindik qatar qolbailaý bolyp otyr.
«Jumyspen qamtylǵan sanattyń biliktilik daǵdylary Ekonomikalyq yntymaqtastyq jáne damý uiymy elderiniń ortasha deńgeiine jetse, bir jyldaǵy jiyntyq tabysy 24 mlrd dolarǵa artyq bolar edi. Qazaqstandaǵy 25-65 jas arasyndaǵy eresek adamdardyń 95%-y biliktilik kýrsy men oqytý jobasyna qatysqysy kelmeidi. EYDU elderinde bur kórsetkish – 77%. Eresek adamdardyń 26%-y jumystarynda qoldary múlde bosamaityndyǵyn aitsa, 25%-y qosymsha oqýǵa qarjylyq múmkindiginiń joqtyǵyn málim etken», - deidi Aleksandra Molchanovskaia.
Sondai-aq, ol Dúniejúzilik ekonomikalyq forýmnyń saýalnamasy boiynsha aldaǵy 5 jylda búgingi qyzmetkerlerdiń negizgi daǵdylarynyń 40%-y ózgeretinin atady. Osylaisha ərbir ekinshi qyzmetker qaita daiarlaýdan ótýge məjbúr bolatyn kórinedi.
