«Balapan» telearnasynyń janynan «Erekshe bilim alý qajettilikteri bar balalarǵa arnalǵan animatsiia mektebi» jobasy júzege asyryla bastaidy. Bul týraly QR Aqparat jáne qoǵamdyq damý ministri Aida Balaeva Facebook-paraqshasynda jazdy, dep habarlaidy "Ult aqparat".
«Memleket basshysy Qasym-Jomart Toqaev aitqandai, biz erekshe qajettilikteri bar adamdar úshin birdei múmkindik jasaýǵa mindettimiz. Kez kelgen órkenietti, rýhy biik qoǵamnyń ustanymy osyndai bolsa kerek.
HHI ǵasyr myń qubylǵan, syndarly kezeń ǵana emes, bul – jańa múmkindikter zamany. Ásirese, airyqsha qajettilikteri bar erekshe balalardy qoǵamǵa beiimdeý, zaman kóshinen qaldyrmaý – barshamyzǵa ortaq mindet.
Osy oraida, «Qazaqstan» teleradiokorporatsiiasy «Balapan» telearnasynyń janynan «Erekshe bilim alý qajettilikteri bar balalarǵa arnalǵan animatsiia mektebi» jobasyn júzege asyrý bastamasyn kóterip otyrmyn.
Bul sheshimniń utymdy tustaryna toqtala keteiin. Birinshiden, animatsiia salasy elimizde joǵary qarqynmen damyp keledi. Sondyqtan animatsiia mamandary otandyq jáne halyqaralyq naryqta qashan da suranysqa ie bolary sózsiz. Ekinshiden, bul densaýlyǵyna bailanysty bir orynda otyryp jumys isteýge májbúr azamattar úshin óte paidaly alań bolmaq. Úshinshiden, joba jas talanttardyń juldyzyn jaǵatyn, olardyń armanǵa jetý jolyndaǵy alǵashqy baspaldaǵy bolady dep senemiz», - dedi ministr.
Aida Balaevanyń aitýynsha, airyqsha bilim alý qajettilikteri bar balalarǵa jańa múmkindik syilaýdy kózdeitin jáne jumyspen qamtýǵa járdemdesetin mektep jumysy aqpan aiynda bastalmaq.
«Oqytý 14-16 jastaǵy balalar arasynda 6 ai boiy júrgiziledi. Osy oraida qaiyrymdylyq jobasyna eriktilik tanytyp, qoldaý bildirip otyrǵan elimizdegi jetekshi mýltiplikatsiia mamandaryna alǵys bildiremin.
«Erekshe bilim alý qajettilikteri bar balalarǵa arnalǵan animatsiia mektebine» ótinimder balapantv@kaztrk.kz el.poshtasy arqyly qabyldanady», - dep túiindendi vedomstvo basshysy.
Aita keterligi, QR Aqparat jáne qoǵamdyq damý ministrligi qazirgi ýaqytta koreilik jáne japondyq seriktesterimen sol eldiń mamandarynyń qazaqstandyq jas mamandarǵa animatsiiany oqytý jáne sheberlik sabaǵyn ótkizýine qatysty kelissózder ótkizip jatyr.
