Aýyl sharýashylyq ónimderin qadaǵalaityn reseilik "Rosselhoznadzor" qyzmeti Túrkiiadan importtalǵan jemisterden – qaýipti monilioz, qyzanaqtardan virýs tabylǵanyn habarlady. 23 qyrkúiekte vedomstvo ókilderi Túrkiia aýyl sharýashylyǵy ministrliginiń azyq-túlik basqarmasynyń basshysymen kelissóz ótkizgen. Resei biligi "ónimderdiń fitosanitariia qaýipsizdigin kúsheitýdi" suraǵan.
"Rosselhoznadzor" sonymen birge Túrkiiadan importtalatyn jemis-kókónisterdiń pestitsid mólsheri joǵary ekenin alǵa tartqan.
Bul aqparat Resei men Túrkiia basshylarynyń kezdesýine birneshe kún qalǵanda jariialanyp otyr. 29 qyrkúiekte Vladimir Pýtin men Rejep Erdoǵan Sochide kelissóz ótkizedi. Túrik basshysy buǵan deiin kelissózde Siriia jáne eki el arasyndaǵy qarym-qatynas máseleleri talqylanady dep málimdegen.
22 qyrkúiekte Niý-Iorkte BUU Bas assambleiasynda sóilegen Erdoǵan Túrkiia Ýkrainanyń territoriialyq tutastyǵyn qoldaidy jáne anneksiialanǵan Qyrymdy Ýkraina bóligi retinde tanitynyn málimdegen. 20 qyrkúiekte Túrkiia syrtqy ister ministri Qyrymda ótken memlekettik dýma sailaýynyń nátijesin moiyndamaitynyn, sebebi Ankara túbekti Resei ózine zańsyz qosyp aldy dep sanaitynyn jetkizgen.
Resei túrli elderge ónimderin ákelýine shekteý qoiyp, muny syrtqy saiasat quraly retinde jii paidalanady. 2014 jyly Eýroodaq Qyrym anneksiiasy úshin Reseige sanktsiia salǵan. Resei buǵan jaýap retinde odaqtan keletin ónimderge tyiym saldy. Bastapqyda sanktsiia bir jylǵa salynǵan, keiin merzimi uzartyldy. Áli kúnge deiin kúshinde.
