Túrkiia prezidenti Taiip Erdoǵan ulyqtaý rásiminen keiin kúieý balasy Berat Albairakty qarjy ministri qyzmetine taǵaiyndady, - dep habarlaidy kaz.tengrinews.kz Reuters agenttigine silteme jasap.
Bul týraly málimet lira baǵamyna áser etti, valiýta álsirep ketken. Erdoǵannyń jańa reformalaryna sáikes, premer-ministrdiń rólin qysqartyp, endigide prezident óz kabinetin ózi taǵaiyndai alady, ministrlikti ózi quryp, azamattyq qyzmetshilerdi parlamenttiń maquldaýynsyz qyzmetinen bosata alady.
"Elimiz úshin buryn shyǵyny kóp bolǵan saiasi ári ekonomikalyq haosqa ákep soqqan júieden bas tartamyz", - dedi Erdoǵan.
Aita keteiik, Memleket basshysynyń tapsyrmasymen QR premer-ministri Baqytjan Saǵyntaev Túrkiia Respýblikasynyń Prezidenti Rejep Erdoǵannyń saltanatty ulyqtaý rásimine qatysty. Túrkiia Prezidentiniń laýazymyna Rejep Taiip Erdoǵannyń kirisý rásimine 22 memlekettiń basshylary, 28 premer-ministr men parlament spikerleri, sondai-aq halyqaralyq uiymdardyń 6 hatshysy qatysty.
Eske salaiyq, 24 maýsymda Túrkiiada prezidenttik jáne parlamenttik sailaý ótti. Eldiń qazirgi memleket basshysy Rejep Taiip Erdoǵan prezidenttik sailaýda 100 paiyz biýlletenderdi sanaý qorytyndysy boiynsha eń kóp daýys jinady - 26,3 millionnan astam daýys 52,59 paiyz. Parlamenttik sailaýda Erdoǵan basqaratyn Ádildik jáne damý partiiasy eń kóp daýys jinady. Jalpyulttyq daýys berý eldegi memlekettik basqarý formasyn ózgertti, Túrkiia parlamenttikten prezidenttik respýblikaǵa ainaldy.
