- Resei, Túrkiia, Iran, Saýd Arabiiasy jáne Katardyń, sondai-aq siriialyq oppozitsiianyń ókilderi Astanadaǵy Siriia boiynsha kelissózderge qatysýy múmkin, - dep málim etti Túrkiia Prezidenti Taiyp Erdoǵan.
Buǵan deiin Prezident Pýtin túrik kóshbasshysy Taiyp Erdoǵanmen Siriiada qaqtyǵysýshy taraptarǵa Astanada jańa alańda beibit kelissóz úderisin jalǵastyrýdy usyný jaily ýaǵdalasqanyn habarlaǵan. Onyń aitýynsha, bul Jeneva kelissózderin tolyqtyrady.
Qazaqstan Prezidenti Nursultan Nazarbaev Pýtin jáne Erdoǵanmen telefon arqyly sóilesý barysynda bul bastamany qoldap, Qazaqstan elordasynda mundai kelissózder júrgizý úshin qajetti jaǵdai jasaýǵa daiyn ekenin málimdedi.
«Biz mundai bastamaǵa qarsy emespiz. Bul másele SIM deńgeiinde qaralýda. Astanaǵa siriialyq oppozitsiianyń ókilderi, sondai-aq Resei, Túrkiia, Iran, Saýd Arabiiasy jáne Katardyń ókilderi shaqyrylýy múmkin. Katar men Saýd Arabiiasynyń Astanadaǵy sammitke qatysýy Túrkiia úshin mańyzdy. Biz Qazaqstanǵa terroristik uiymdardyń ókilderin shaqyrý jónindegi usynysty qoldamaimyz», - dedi Erdoǵan Ankarada ótken baspasóz máslihaty kezinde, dep habarlaidy reseilik «RIA Novosti» agenttigi.
Túrkiia Prezident Jenevadaǵy Siriiaǵa qatysty kelissózderdiń nátijesizdigin málim etti. Onyń aitýynsha, Pýtin «jenevalyq úderistiń» iske aspaýyna bailanysty Astanada Siriiaǵa qatysty halyqaralyq kezdesý ótkizý týraly bastama kótergenin atap ótti.
