Foto Tengrinews.kz/Alihan Sariev
Búgin Úkimet otyrysynda QR Ulttyq bank tóraǵasy Erbolat Dosaev teńgeniń álsireý sebebin atady, dep habarlaidy QazAqparat.
«Biylǵy jylǵy qarashada koronavirýstyń jańa shtamynyń tabylýy jáne onyń AQSh pen Eýropada taralýyna qatysty habarlardyń taraýy aiasynda álemdik qarjy jáne taýar naryqtarynda joǵary qubylmalylyq baiqaldy. Bul munaidyń belgilengen baǵasynyń kúrt tómendeýine alyp keldi. Munaidyń álemdik baǵasy tamyzdyń sońynan bastap eń tómengi deńgei – bir barrel úshin 65-66 AQSh dollaryna deiin arzandady», - dedi ol.
UB tóraǵasynyń aitýynsha, álemdik valiýta naryǵynda da damýshy elder valiýtalarynyń jahandyq álsireýi baiqaldy: Resei rýbli bir aida 4,7, Ońtústik Afrika randy 4,3, Meksika pesosy 4,3 paiyzǵa álsiredi.
«Irgeli faktorlardyń nasharlaýy qarashada teńgeniń bir AQSh dollary úshin 434 teńge 20 tiynǵa deiin 1,7 paiyzǵa álsireýine sebep boldy. Biylǵy jylǵy 8 jeltoqsandaǵy jaǵdai boiynsha teńge baǵamy bir AQSh dollary úshin 434 teńge 46 tiyndy qurady», - dedi Erbolat Dosaev.
Onyń atap ótýinshe, biýdjetke transfertter bólý úshin Ulttyq qor qarajatyn konvertatsiialaý operatsiialary jáne kvazimemlekettik sektor satýlary ulttyq valiýtaǵa qoldaý kórsetti. Bul rette salyq kezeńi eksporttaýshylardaǵy teńgelik ótimdiliktiń jetkiliktiligine bailanysty ulttyq valiýtaǵa aitarlyqtai qoldaý kórsete alǵan joq.
«Belgisizdiktiń týyndaýy men syrtqy jaǵdailardyń kúrt nasharlaýy aiasynda jeke jáne zańdy tulǵalarda shetel valiýtasyna suranys aitarlyqtai ósti. Ulttyq bank teńgeni turaqsyzdandyratyn aýytqýlardy boldyrmaý maqsatynda biylǵy jylǵy qarashanyń sońǵy kúnderinde 239 mln AQSh dollary somasyna 2020 jylǵy qazannan bastap alǵash ret valiýtalyq interventsiia júrgizdi», - dedi UB tóraǵasy.
