Almaty ákimi Erbolat Dosaev DDU bas direktory Tedros Gebreiesýspen kezdesti, dep habarlaidy QazAqparat.
Dúniejúzilik densaýlyq saqtaý uiymynyń bas direktory Tedros Gebreiesýspen densaýlyq saqtaý salasyndaǵy yntymaqtastyqty nyǵaitý, onyń ishinde COVID-19-ǵa qarsy is-qimyl, mamandardy oqytý jáne jańa tehnologiialardy tartý máseleleri talqylandy.
Talqylaý barysynda Almaty qalasyndaǵy epidemiologiialyq jaǵdaidyń turaqty bolyp qalatyny – qalanyń «jasyl aimaqta» turǵany, koronavirýstyq infektsiiamen kúresý úshin qajetti resýrstarmen qamtamasyz etilgeni jáne DDU usynymdaryn ustanatyny atap ótildi. Qala basshysy Erbolat Dosaev COVID-19 qalanyń densaýlyq saqtaý júiesindegi álsiz jerlerdi ashqanyn atap ótti.
«Pandemiia birinshi kezekte neni jaqsartý kerektigin kórsetti jáne biz qajetti jumystardy júrgizýge niettimiz, onyń ishinde alǵashqy meditsinalyq-sanitarlyq kómektiń (MSAK) yqpaly turǵysynan kórsetti. Biz qaladaǵy jaǵdaidy jaqsartýǵa niettimiz. Ol úshin meditsinalyq mekemelerge jóndeý jáne jańǵyrtý júrgizýdi, kadrlyq áleýetti kúsheitýdi jáne DDU-nyń ozyq praktikalary men usynymdaryn iske asyrý alańyna ainaldyrýdy josparlaýdamyz. Kelesi 2-3 jyl qalalyq densaýlyq saqtaý júiesin reformalaý úshin óte mańyzdy», - dedi Almaty ákimi.
Óz kezeginde Dúniejúzilik densaýlyq saqtaý uiymynyń basshysy Tedros Gebreiesýs qala basshysyn qoldady, alǵashqy meditsinalyq-sanitarlyq kómektiń mańyzdylyǵyn atap ótti jáne Qazaqstannyń osy saladaǵy tájiribesin joǵary baǵalady (Qazaqstan MSAK-tyń otany bolyp sanalady, MSAK jónindegi Almaty deklaratsiiasy 1978 jylǵy 12 qyrkúiekte qabyldandy, 2015 jyly Almatyda MSAK jónindegi DDU-nyń ofisi ashyldy).
«DDU álemge kóptegen múmkindikter beretin alǵashqy meditsinalyq-sanitarlyq kómek ortalyǵyna shoǵyrlanǵan. Kelesi jyly Niý-Iorkte meditsinalyq saqtandyrýmen jalpy qamtý boiynsha joǵary deńgeidegi kezdesý ótedi. Biz Qazaqstannyń ózimizben birge jumys istegenin jáne alǵashqy meditsinalyq-sanitarlyq kómek aspektileri boiynsha jetekshi ról atqarǵanyn qalaimyz», – dedi Tedros Gebreiesýs.
Taraptar sondai-aq Almaty aýmaǵynda jumys isteitin DDU-nyń MSAK jónindegi geografiialyq jaǵynan qashyq ornalasqan óńirlik ofisi aiasynda yntymaqtastyqty kúsheitý týraly ýaǵdalasty.
Qala basshysy Almatynyń densaýlyq saqtaý salasyn damytý úshin ozyq álemdik tájiribe men úzdik praktikany paidalanýǵa asa múddeli ekenin atap ótti.
