QR Ulttyq bankiniń tóraǵasy Erbolat Dosaev Úkimet otyrysynda syrtqy qarjy jáne taýar naryqtary men ishki ekonomikanyń tamyzdaǵy ahýaly týraly baiandady, dep habarlaidy QazAqparat.
«Tutyný naryǵyndaǵy teńgerimsizdik aiasynda álemdegi infliatsiianyń ósýi jalǵasyp otyr. Álemdegi joǵary iskerlik belsendilik aiasynda taýarlarǵa suranystyń artýy baǵanyń ósimine áser etetin usynys múmkindikterinen asyp túsýde. Nátijesinde infliatsiialyq protsester tutyný naryǵynda saqtalyp otyrǵan teńgerimsizdikter aiasynda damyǵan elderde, sol siiaqty damýshy elderde de burynǵysynsha jedeldei tústi», - dep bastady ol sózin.
Aitýyna qaraǵanda, azyq-túlik naryǵyndaǵy teńgerimsizdik infliatsiiaǵa erekshe áser etip otyr.
«Biylǵy tamyzda 2 ai baiaýlaǵannan keiin álemdegi azyq-túlik baǵasy qaita ósýin jalǵastyrdy. ǴAO tizbesindegi azyq-túlik baǵalarynyń indeksi jyldyq kórsetkishte 32,9%-ke ulǵaiyp, 127,4-ke jetti. Bul qant, ósimdik mailary men dándi daqyldar baǵasynyń aitarlyqtai kóterilýine bailanysty oryn aldy», - dedi Erbolat Dosaev.
Ulttyq bank tóraǵasy bidai óndirisiniń nasharlaýyna bailanysty dándi daqyldardyń álemdik baǵa indeksi 129,8-ge deiin, ósimdik mailarynyń álemdik baǵa indeksi 165,7-ge deiin óskenin aitady.
«Saldarynan qanttyń álemdik baǵa indeksi Braziliiadaǵy qurǵaqshylyq saldarynan 2017 jylǵy aqpannan bastap eń joǵarǵy baǵa – 120,1-ge deiin ósti. Azyq-túlik naryǵynda saqtalyp otyrǵan teńgerimsizdik álemdegi, tiisinshe Qazaqstandaǵy infliatsiia dinamikasyna teris áser etýdi jalǵastyrady», - dedi Ulttyq bank basshysy.
