QR Ulttyq bankiniń tóraǵasy Erbolat Dosaev Qazaqstan qarjygerleriniń IX kongresinde qarjy sektoryndaǵy úsh jahandyq syn-qater týraly aityp berdi, dep habarlaidy QazAqparat.
«Búkil álemdik ekonomika siiaqty Qazaqstan ekonomikasy da sońǵy 2 jylda koronavirýs pandemiiasyna bailanysty ǵasyr daǵdarysyn bastan ótkerip otyr. Mundai jaǵdaida qarjy sektory úsh jahandyq syn-qaterge qarsy kelip tur. Birinshi syn-qater – infliatsiianyń jappai ósýi jáne álemdik taýar naryqtaryndaǵy suranys pen usynystyń teńgerimsizdigi jáne taýar jetkizý isiniń toqtap qalýynan infliatsiialyq qysymnyń kóterilýi», - dedi Erbolat Dosaev.
Onyń aitýynsha, álemdik ekonomika qarqyndy túrde qalpyna kelip jatyr jáne vaktsinalaý arqasynda biylǵy 3-toqsanda pandemiiaǵa deiingi deńgeige qaita oraldy. Álemdik naqty JIÓ 2021 jyly 40 jyldan astam ýaqyt ishinde eń jyldam ósedi jáne Halyqaralyq valiýta qorynyń boljamdary boiynsha 5,9%-ti quraidy dep kútilýde.
«Álemdik ekonomika qalpyna keltirilgen soń shekteýli usynys kezindegi suranystyń tez ósýi kóptegen jyldar boiy shikizattyń, kólik shyǵystarynyń rekordtyq ósýine jáne sonyń nátijesinde álemdegi infliatsiialyq qysymnyń joǵarylaýyna alyp keledi. Jańa perspektivalar men keń múmkindikter ashatyn ekinshi syn-qater – pandemiia áserinen búkil álemdik ekonomikany jedel tsifrlandyrý. Transformatsiialyq protsester utqyrlyq, yńǵailylyq jáne qaýipsizdik talaptaryna jaýap beretin qarjylyq qyzmetterdi usynýdyń jańa formattaryn birinshi orynǵa shyǵardy», - dedi Ulttyq bank tóraǵasy.
Al kún tártibinde turǵan úshinshi syn-qater – klimattyq ózgeristerge qarsy kúres. Memleket basshysynyń ózi bul máselege kóp kóńil bóledi. Ol jasyl ekonomikaǵa belsendi túrde kóshýdiń jáne qarjy sektory úshin ornyqty damý qaǵidattaryn engizýdiń mańyzdylyǵyn atap ótken.
«Bolashaqta bizdi klimattyq jaǵdailarǵa tikelei áser etýden bólek jaýapty investitsiialaý qaǵidattary eskerilgen qarjylyq landshafttyń ózgerýi kútip tur. Jahandyq syn-qaterler men qazirgi protsesterdi eskere otyryp, Ulttyq Bank biylǵy naýryzda aqsha-kredit saiasatynyń 2030 jylǵa deiingi strategiiasyn bekitti, ol aqsha-kredit saiasatyn júrgizýdiń institýtsionaldyq jáne operatsiialyq negizin kúsheitý, qarjy sektoryn monetarlyq saiasattyń tiimdi deldaly retinde damytý jáne makroekonomikalyq saiasattyń kontrtsikldylyǵyn arttyra otyryp, ekonomikany odan ári ártaraptandyrý siiaqty úsh negizgi baǵyttan turady», - dedi Dosaev.
