Foto: Inga Imanbaidyń Facebook-tegi paraqshasynan
Áskerde boryshyn óteý kezinde aýyr jaraqat alyp, komaǵa túsken Erbaian Muhtardyń advokaty Inga Imanbai tergeý organdaryna taǵy da kúmán bildiretinin áleýmettik jelige jazdy, dep habarlaidy ULT.KZ.
"Dabyl qaǵýǵa májbúrmin. Dostar, Erbaiannyń isi boiynsha saraptama daiyn. Birneshe kúnnen beri Sizderge aitar jańalyǵym bar dep júrgenim osy edi. Negizi saraptama áldeqashan daiyn bolǵan. Biraq, tergeýshi ony eki kún buryn ǵana maǵan aityp, keshe saraptamamen tanysýym kerek edi. Men tergeýshimen kelisken ýaqytta kúttim, ol qońyraýǵa jaýap bergen joq. Kesh bolyp ketkesin vatsapqa habarlama jazdym. Jaýaby maǵan syltaý, ýaqyt sozý siiaqty kórindi. Tergeýge qatysty kúmánim kúsheidi. Áitpese daiyn turǵan saraptamamen tanystyrýdyń nesi qiyn? Sondyqtan, is burmalanyp, kináliler, Erbaiandy osy kúige jetkizgender jazasyz qala ma degen kúmánim kúsheidi", – dep jazady Inga Imanbai.
Sondyqtan, Erbaian Muhtardyń advokaty jaǵdaidy áleýmettik jelige ashyq jazyp, tergeýden, quzyrly organdardan jaýapty ashyq talap etetitin aityp otyr.
Eske salsaq, byltyr Ulttyq ulannyń 5571 bóliminde boryshyn ótep júrgen Erbaian Muhtar aýyr jaǵdaida aýrýhanaǵa túsken. Áskeri bólim «sarbaz dárethanada ózi qulap, basyn kafelge soǵyp aldy» degen. Erbaian Muhtardyń ata-anasy buǵan senbeidi.
Erbaian Muhtardy Túrkiiaǵa Qorǵanys ministrliginiń arnaiy bortymen Ystambuldaǵy “Medikal-Park” klinikasyna jatqyzylyp, em qabyldap jatyr.
